ГIергъиси замана жамигIятлизиб чеимцIаси пикри бяхIчииули саби чеалкIуси наслулис патриот бяркъ бедлугниличи. СенахIенну дахъал сари гьар бархIи Западла улкнани нушала жагьилти бархьси гьунчибад къардбухъахъес пикридирути далилти.
Улкала бухIнаб гъузгъалдидеш акIахъес, адамти цаличи ца гьимичеббарес, пачалихъличи къаршили кабизахъес илдани халаси къайгъи бирули саби. Ил багьандан гIулухъабас ва жагьилтас бархьси бяркъ бедни ва патриотуни кьяйдали халабаахъни гьарил халаси адамла чебла саби.
Чуйна бурахIеллира, чеалкIуси наслулизибад саби нушала челябкьлара дигахъуси. Ил шаласили ва даршусили биахъес багьандан, лерилра цадиэс хIяжатбиркур. Нуша диштIахIели мугIяллимтани ва бегIтани бурули бири: «Неш дигахъусилис — вегIла ВатIанра дигахъу». Илди гьарли-марли дархьти дугьби сари. Неш бегIлара гIязизси ва дурхъаси адам сарни дурхIнани биштIахIейчибад балуси саби. ВатIан сецадла нушаб дурхъасили биэс хIяжатсил аргъахъес, нешличил ил цугбурцусири. ХIера, гьаннала биштIатани илгъуна бурала бикьули ахIен. Неш дигахъусилис ВатIанра, вегI акIубти мер-мусара, нешла мезра дигахъу. Илди далилти гьарил виштIасила дагьрилизир минадарес хIяжатли саби. Нешла мез хIедалути биштIати бахъал саби. Ил анцIбукь бегIлара децIагесили бетарули саби. Авъибил классла бучIанти англияла мезличи бурсибарес башахъули нушани чебиулра. Англияла мезли се халаси гIяхI лебху дурхIнала гIямрулизи, нешла мезли хIехуси. Халати адамти, тилади саби, пикридухъеная! Нешла мез се дирути ибси предложениели бекIлил дазу агарси мягIна бухIнабурцули саби. Халати илкьяйдали бикIалли, биштIатани сен-сен илди гIерисутив. ЧеалкIуси наслулис илгъуна мисал ахIен нушани чебаахъес хIяжатси. Пикридухъеная!

ПатIимат Шахова