Сергокъалала районна ХIурхъила шилизирадси РСФСР-ла ва Россияла рурибси мугIял­лим, гIяхIцад дусмазиб асилси бузери ахъси даражаличиб тIашбатурси пергер хIянчизар, мал­хIям­си дубурлан хьунул адам ЯхIъяева Жаго МяхIям­ма­дов­на ишдуслизир 90 дус риубли сари.

Илгъуна разиси анцIбукь­личил бархбасахъи, Сергокъалала районна бекI Арсен МяхIяммадовли ил юбилейличил мубаракрариб:

«ХIурматла Жаго МяхIяммадовна. УркIи-ур­кIи­ларад дила ва арагIебли районна халкьла шайзирад 90 дус риънила юбилейличил мубаракрирулри.

ХIела гIямру – ахIерси ванзалис, дагъистанлантас ва багьудлуми тIинтIдирнила чебяхIси баркьудилис къуллукъличи кабиибси гьарли-марси экнциклопедия сари.  Нушала дурхIнас, культуралис, шаласи челябкьлалис багъишлабарибси бузерила, пасихIдешла, рухIла дебадешла урчIемал вецIлихъ.

ХIурхъантала чумра наслулис хIу халаси хIярп­ли­чилси МугIяллим, устадешчерси педагог-физик сарри. ХIела дурсри бахъал бучIантас гIямрулизи путевкали детаур. Районна собраниела депутатла ва багьудила шайчибси комиссияла председательла къуллукъличир дарибти хIела хIянчили нушала муниципалитетла багьудила кабиз гьалабяхI башахънилизир мурхьти къел калахъунри.

Республикала ва Россияла рурибси мугIяллимла, жамигIятла хIяракатчила, ХIурматла гражданинна уми – илди шабагъатуницун ахIен. Илди хIела сабухъчебси бузери, санигIятлис мардеш халкьли чихъли кьиматладирни сари.

ХIела гIямрула гьуни – ВатIайчи дигила, кахIебур­хуси цIакьла ва рухIла дебадешла гьарли-марси мисал саби. Бамсриихъуси заманара хIу лебтасалра адаб-хIяяла, пасихIдешла хьулчили кавлулри.

АхIерси Жаго МяхIяммадовна! Иш разиси бархIи хIед чIумаси арадеш, уркIила малхIямдеш ва ванадеш дулгулра. ХIела гIямрула бурхIни гъамтала хIерудиличил, дигиличил алавдуцили дигулра!»