Дагъиста гьарил шилизиб сегъуна-биалра пагьмуличил машгьурбиубти адамти леб. ЦацабехIти хабарла спортсменти саби, цархIилти — поэтуни-писательти, хIябэсити — динна ва жамигIятла гIямрулизир жигарла бутIакьяндеш дирути хIяракатчиби. Илкьяйдали ил сияхI даимбаресра вирар.
Дила макьалализиб наб бурес дигулра Дахадаевла районна ЧIишила шилизибадти узби Жамал ва Залум Халибрагьимовхъалачила.
Халибрагьимов Жамал Биарсланович акIубси сай 1958 ибил дуслизив. Шила школализиб гехIел дусла белчIуди касибхIели, ил Каспийсклизи, бузерила санигIятуначи бегIбируси училищелизи керхур. ГIур, 1978 ибил дуслизив Хайдакьла районна Родниковый посёлоклизирти механизаторти хIядурдирути ца дусла курсани хъараахъур.
1980 ибил дуслизив Жамал Халибрагьимов хъайчикайиб. Баягъи ил дуслизив ил гIярмиялизиб къуллукъбарахъес живарибсири. ГIярмиялизивад чарухъи, ца дус дикили гIергъи, Ж.Халибрагьимовли Ставропольла крайла Предгорный районна «Охотсоюз»-ла инспекциялизир хIянчи дариб. Илавадли «Родник-Агро» СХП-ла ООО-ла предприятиелизи шурухъун ва декIар-декIарти къуллукъуни дузахъес вехIихьиб. БусягIятра илав узули сай.
Жамал Халибрагьимовла виштIахIейчивад поэзияличи, далуйтачи халаси иштяхI бири. Ил багьандан, школализив учIули левай, къумуз, жикьи дирхъес бурсивиубсири. ИшбархIи ил кIел жузла автор, гIяхIцад даргантани ункъли валуси поэт-далайчира сай.
Илини дураиб ишдигъунти жузи: «Юлдашунас чархараби» (2017 ибил дус), «Дигайла гьуни» (2022 ибил дус).
Буралли, илала хъалибарглизив гьатIира лев лукIес дигуси: илала виштIаси узи Залум Халибрагьимов. Илалара 12 жуз дурадухъи сари.
Халибрагьимов Залум Биарсланович акIубси сай 1972 ибил дусла майла 5-личив Дахадаевла районна ЧIишилила шилизив. 1979 ибил дусличивад 1990 ибил дусличи бикайчи ил шила урга даражала школализив учIули, мурхьти багьудлуми касес бажардивикиб. Школа хьараахъурхIели биалли, ил РФ-ла духIнарти гIяскуртазиб къуллукъбарес арякьунсири. ГIярмиялизивад чарухъунхIели, ил мурталра шантас багалавирули, хIялалли хIеркайрулри.
З.Халибрагьимов хъайчикайибсири 1994 ибил дуслизив. Илала 3 дурхIя леб. Юлдашунала, тухумтала ва шантала ургаб илини, дяхI шаласи, мурталра разиси, кумек хIяжатбикибхIели кумекбируси сайливан, халаси хIурмат сархиб.
Залум Халибрагьимовли акьуси замана сунела шила тарих руркъули сай. Ил гъамси заманализиб «ЧIишилила тарих» бикIуси жуз дураэс хIядурикIули сай. Залумли дуракаибти жузи шантас, шила гIядатунас ва хъумхIертести анцIбукьунас хасдарибти сари. Сегъунти-биалра тамашала баянти цаладяхъес ибси кьасличил ил шила гьести гIямрула адамтачил къаршивиркур. Архивлизирти материалти, документуни, хъалибаргунала суратуни руркъули вирар.
ГIергъити дусмазиб илала халаси иштяхI леб гIярабла мез ва гIилму дяркъесра. Камси заманала ухIнав ил гIяраб мезли учIес ва лукIес бурсикайуб. ГIур биалли, лебил Кьуръан белчIун. Залум Халибрагьимовли чумал районна Кьуръан дучIутала абзлизир бутIакьяндеш дариб ва иларра гIяхIти хIясилти чедаахъиб. Районна имамли илис ХIурматла Грамотара бедибсири.
Бузери чихъли кьиматлабирути узби Жамал ва Залум Халибрагьимовхъалас нуни чIумаси арадеш ва хъулиб баракат дулгулра. ДугадикIаб хIушала кьаламти ва мурхьдикIаб пагьмурти!
МяхIяммадшапи Матаев
