Нушала Камила
Поэт сарливан ну дурхIначил гьунираахъес дахъал школабази жирарира учительтани, назмурти дучIухIели, конкурсла жюрилизира чуйнара релкIунра.
ГIяйиб мабараб, нушала дурхIнани назму белчIес балули биалра, нешла мез далули ахIен. Назму бучIухIелира кIирка хIурпри лерти дугьби дурес бирули ахIен. Чи саю гIяйибла вегI? Гьайгьайрагу, бегI гьалар неш гъайрикIес гIягIниси сари вегIла мезли дурхIнази. Школализи букьяйчи дурхIнани баралра мез дагьес хIяжатсигу. Школализир кадирхьути жумягIли 1-2 дарсличир учительли селра багьахъес хIейрар. Амма леб дурхIни нешла мез дагьес къайгъназибтира. Ну тамашариублира Каспийскла 3-ибил школализир ручIуси 3-ибил классла рурсиличи. Ил сари Камила Рабазанова. Иличил тянишриубра «ИсмягIил» бикIуси хъарахълизир. Ил сунела хала неш ва хала дудеш хIербируси хъарахълизи рашули сари каникултала замана. Хала нешлис сегъуна кумекбирулил бурули сари дарган мезли. Дарган мезли гъайрикIухIели ца девалра урус мезла гъудурбирули ахIен ил риштIаси рурсили. Илини бурули сари ва чебиахъули сари секьяйда кьял изусил, къачни далхутил. Гьарил хIяйва умира лер.
Сунела риштIаси рузи Хамисра дарган мезли гъайрикIахъес бурсирирули сари. Камилани дахъал назмурти уркIиличир далули сари, конкурсуначир бутIакьяндеш дирули, цаибти мерани кайсули сари.
ТамашахIейэс хIейрар ил чераибси: гьарли-марли духуси дарган рурси сари ил. Иличила аргъибхIели, ну РГВК-ла репортёрра арукили, хъарахълизи рякьунра передача барес. Илини илар назмуртира делчIун, сунени далути хIянчира дариб. Камилагъунти дурхIни бахъал лебти биаллири, нуша мез дубкIниличила шишимтази хIедиркира.
Пахрубирулра Дахадаевла районна ЧIишилила шилизибадти бегIтала рурсиличи. Камилас хасбарили, назмура белкIунра.
ХIуни иш дунъя гьайбаркь
Кьяшми кунк айгъирливан,
ГIямрулира релкъаби
Аръали вава-кьарван.
ХIу даргала риънила
Сарри лебтас пахрула,
Дила ригул Камила
Гьарбилзаб гьар ганз хIела.
ХIед алкунси зубари
ШалабикIаб мурталра,
Даргала гIилмулизи
Гьардилзаб гьундурира.
Дарган мез – гIилму сари
АхIен бахълис гьамадти,
ХIуниван илди дагьес
ХIебирулигу бахъли.
Дарган мезла байрахъра
ХIуни ахъли бихулри,
ВатIара бегIталара
ХIу чIумаси къакъбяхъри.
Дурхъати дарган мезла
Багьа бакIахъилири,
ЧIишиланти хамбарес
Дунъяличир акIубри.
Дерхъаб хIела гIямру,
Камила!