МухIела шилизирадси ГIябдулгъапарова Хадижат ХIясангIялиевнани школа таманбарили гIергъи, Дагъиста пачалихъла университетлизи карерхур. Университет ункъли ручIули хъараахъур.
Илини сунела бузерила гьуни бехIбихьиб 1980 ибил дуслизир ХIерхмахьила урга даражала школализир бехIбихьудла классунала учительницали рузули. ГIур Хадижат урус мезла ва литературала дурсри кадирхьули рузес рехрихьиб.
Ил 1988 ибил дусличирад МухIела шилизибси лицейлизир урус мезла ва литературала, дарган мезла ва литературала дурсри кадирхьули рузули сари.
Хадижатли сунела лерилра гIямру бучIантас хасдирули сари, багьуди имцIабиахъес багьандан сагати кьяйдурти пайдаладирули.
Сунени бучIахъули калунти уршби-рурсбанира иличил бархбас бузахъули саби. Хадижат сунела шайзибад илдас сегъуна кумек хIяжатбикалра илдачил разили гьунириур.
Илини сунела багьудира чеимцIабикIахъес хъумуртули ахIен. Хадижат мурталра сагасалигIир умцIули рирар. Илин сагали бузес бехIбирхьути учительтасра кумекбирули рирар, сунени дурсри кадирхьнила тяхIяр-кьяйдаличил илдира тянишбирули.
Хадижатли бучIахъути дурхIнани олимпиадабачир, конкурсуназир бутIакьяндеш дарили, гьаларти мераначи лайикьбиркули саби. БучIанти гIяхIси багьудира касахъили, олимпиадабачи ва конкурсуначи хIядурбирнилис Хадижат дахъал ХIурматла Грамотабачил ва Баркаллала кагъуртачил шабагъатларарили сари.
Ил «РФ-ла цахIнабси багьудила хIурматла хIянчизар» бикIуси уличира лайикьрикили сари. Хадижатли лерилра детурхути семинартазир ва конференциябачир бутIакьяндеш дирули рирар.
2010-ибил дуслизиб МяхIячкъала шагьарлизиб бетурхуси НИИ-ла педагогикала «Даргала мезла лексикала методика» бикIуси разработкала соавторра сари.
Хадижатли халаси къайгъи бирули сари нешла мез мяхIкамдарес, мезличи бучIантала диги имцIадиахъес багьандан. Хадижатли бучIантала бегIтачилра бархбасуни уржахъули сари.
Илини нешла мезлис хасдарибти конкурсуни дурадуркIули рирар, бяхIла газетаби, даргала писательтала произведениеби хIясибли нешла мезличил сценкаби гьаладирхьули рирар. КъантIли буралли, школала гIямрулизир жигарла бутIакьяндеш диру.
Илис чIумаси арадеш ва бузерилизир сархибдешуни дулгулра!
С.ГIябдуллаева
