Сергокъалала районнизиб архIя дураберкIибхIели, ДР-ла культурала министр Зарема Бутаева мурегала някьишла цаибил класслизи рякьун. Ил мерлабиубси саби Мурегала шилизибси халали ахIенси хъулиб.

Илаб устадешличи бурсибирути рурсбани урхIмешули ахIенти тяхIяр-кьяйдаличил ва дукIулти гимачил акIахъубти тамашала някьиш чедаахъиб. Илди някьишли нушала хала бегIтала палтар, илкьяйдали гIянулбала къупри ва чекадуршути чIянкIурби жагадирутири.

Халкьла някъбани жагадешуни далкьарахънила пергер санигIят бузахъули рузули сари пагьмучерси уста Заира ГIялибекова. Илини миллатла кIунбала жявхIелла коллекция мяхIкамли бихIули леб. Илкьяйдали илини мурегала някьишла сихIрула дунъялизи жигарчерли жагьилти битIикIули сари, иличибли культурала букьур мяхIкамбирнилизи мекелли халаси пай кабирхьули.

ДР-ла культурала министр Зарема Бутаевани дурхIначил ихтилат дураберкIиб ва някьиш дирнила бекIлидиубти дигIяндешуначила багьур.

Районна бекIличил рарх ил Мурегала шилизибси культурала Юртлизира рякьун. Иларти адамти хIербикIухIели кабирути утни, цархIилти гIягIниахълуми, сценаличир пайдаладирути палтар сагадарни – культурала далдуцуни дурадуркIнила даража къулайбирнила бяхIчибизуни сари.

Министрли Федерацияла программабазир бутIакьяндеш дарахъес гIярзаби гьаладихьахъес маслигIятра бариб, иличибли культурала Юртла шуртIри ункъдиахъес имканбикIахъу.

Сергокъалала районна багьахънибала центр