Нушала ахIерси Дубурлан Улкализивадси гьарилра ургъан СВО-ла мер-мусаличив ВатIайс мардеш чедиахъули, гъабзадешличил ургъули сай.
Сецад хIейгеси биалра, цацабехIтас чула гIямру кьурбандаресра кьадарбиуб…

Амма ишбархIи нуша паргъатли дусахъес, хьанцIа закла удир урехиагарли къунздикIахъес чула лерилра цIакьани дяхIчиаили, душмайчил дяхI-дяхIли бургъути нушала асил уршбани гъабзадешла баркьудлуми дурадуркIули сари. Илди саби гьаннала манзилла игитуни.

Илдигъунтала лугIилизивад ца сай Лавашала районна МикIхIила шилизивадси МяхIяммадов Жамалудин Нугьрадиновичра. Гьайгьайрагу, гьалабра газета иличила, илала гъабзадешла гьунартачила, пергер адамдешличила чуйнара гъайбухъунсири. Сен-биалра, иш яргализибра иличила бурес цагьатIи разиси анцIбукь кабикиб: ил «Дагъиста халкьла игит» бикIуси мургьила зубариличил шабагъатлавариб.

Гьайгьайрагу, сецад шабагъатуни дедалра, ил лайикьсира сай. СенахIенну Жамалудинни СВО бехIбихьибти цаибти бурхIназирадал илизир жигарла бутIакьяндеш дирули сари. Дявила хъарбаркьуни халати жавабкадешличил ва асилдешличил тамандируси ургъанни бархкьябала ургабра халаси хIурмат сархиб.

Нушанира Жамалудин МяхIяммадов ил шабагъатличил уркIи-уркIилавад мубараквирехIе ва бархкьябира сайра, жяв-жявли дургъби тамандиубли, хъалибаргличи, узи-уршиличи ва шантачи чарбухъахъес дулгехIе.

Бемжур дявила дайлаб
Каммабиаб микIхIен яхI,
Ил буцIарси гъазалаб
Дарсмадиаб хIела дяхI.

Хъардяхъибти хIечира
ВатIан гьанни ургъуси,
СягIятличи хьуллира
Чедибдеш гъамбируси.

Шанда някъба дуцибти
ХъуцIарличи ярагъра,
Душмайчи хIердирути
ХIела хIерлизир цIара.

Чарухъаби хIу жявли
ХIечи бихьиб умутра,
Якьинбара гIяламла
Сархили чедибдешра

Баркалла узи Жамал,
ХIела чIумаси яхIлис,
ГIярасайлизив левай,
ХIуни сархул гьунарлис.

 

Хадижат ГIямарова,
Ставропольла край