ИсмягIилов МяхIяммад ГIябдуллахIяжиевич акIубси сай Бутрила шилизив, мугIяллимтала хъалибарглизив.
Шилизибси урга даражала школализир МяхIяммадла дудеш ГIябдуллахIяжини математикала, информатикала ва неш ПатIиматли нешла мезла, дурсри кадирхьули, дахъал дусмазиб хIялалси хIянчи бирули саби. ДурхIначи дигичебти ГIябдуллахIяжини ва ПатIиматли бучIанти багьудичебтили халабаахъес халаси хIяракат бирули саби. Илдани чула дурхIнира жагали абикьурли, гIяхIси бяркъра бедили, багьудира касахъили, гIямрула дякьличи дураили саби.
Илдала ца урши МяхIяммадли гьанна Камчаткализиб ВатIайс къуллукъбирули сай. МяхIяммад, гIяхIти кьиматуначил Бутрила шилизибси урга даражала школа таманбарили гIергъи, ВатIайс къуллукъбарахъес живариб.
МяхIяммадла бегIтачи сунени къуллукъбируси частьла командирла шайзибад Баркаллала кагъарра бакIили саби. Илизиб уршили мардешличил ВатIайс къуллукъбирнилис баркалла балахъули саби.
Школализив учIухIелира МяхIяммадла бахъал юлдашуни лебтири. Паргъатси, адамтачил валгунси уршили школализив учIухIели спортла шайчирти абзаназирра бутIакьяндеш дирутири.
МяхIяммадлис мардешличил, гъабзадешличил ВатIайс къуллукъра барили, ара-сагъли сунела бегIтачи, узи-рузичи, юлдашуначи чарухъес кьадарбиаб!

С.ГIябдуллаева