Дахадаевла районнизивадси Россияла Игит СягIид Ибрагьимов муниципалитетлизи кумекличил ваиб. Илала мурад сабри ванза хIусбухъи, зараллизи бикибти цаванзаланти гIеббуцни.
Дахадаевла районна бекI МяхIяммад ГIябдулкьадировли ва илала заместитель Артур ХIямзатовли Россияла Игитлис бутIакьяндеш дарнилис ва къалабали кумек гIеббаахънилис баркалла багьахъур. «Дахадаевла районна лебилра адамтала шайзибад нушани баркалла балахъулра кадизурти аги-кьяйдализиб кумекбарнилис. Ишди бурхIназир хIу нушала мякьлав виъни — икьалабирнила лишанцунра ахIенну, нушала цадешличила гьанбикахънира саби», — викIи МяхIяммад ГIябдулкьадиров.
СягIид Ибрагьимовли буриливан, дявила хасси балбуц бетурхуси мер-мусаличиб илини ва дявила гьалмагъунани биштIаси ВатIайзир кадиркути анцIбукьуначила бакьиб. Кабикибси гьанагарси балагьла асурти чедаили, шайчив калес хIейуб ва кумекличил районнизи ваиб.
«ВатIан жибикIухIели, нуша гьарахълар диахIелра, жаваб чарбирулра. Дахадаевла район бяхIягибси балагьли нушазивад цалра паргъатли кахIелахъун. Нуша иша кумекбаресцунра ахIенрану, къиянси замана цаванзалантачил дарх диэс, илди гIеббуцес дакIибтира», — цIакьбарили буриб Россияла Игитли.
Илкьяйдали илини биштIаси ВатIайзи вакIнила замана къантIси биъниличила ва, чумал бархIи дикибхIели, дявила хасси балбуц бетурхуси мер-мусаличи чарулхъниличила багьахъур.
ГьанбиркахъехIе, ванза хIусбухъи Дахадаевла районнизир 97 юрт дукьдуун: 26 юрт тамай заядиубли сари, 71 – дуб-дубли. ТIабигIятла гьанагарси анцIбукьли 251 адамлис зарал биахъуб (Ил лугIилизиб — чулахъуни лебти — 6, дявила хасси балбуцла бутIакьянчибала — 5, яшавла шуртIри гIяшти — 5, бахъал дурхIнала дегIти — 7 хъалибарглис).