ГIяхIти баркьудлумани сари ну­ша-алавти гIямрура шала­дирути, бузахъуси гьарил са­ни­гIятлизир нуша гьаладяхI арди­ку­ти. Ил­ди­гъунти, халкьлис багалати бар­кьуд­лу­ми дурадуркIути адамтани биалли, чу­ли кумек гIеббиахъутала уркIби диги­ли­чил ясир­дурцу, мякьлабтала – пах­рули дир­цIа­хъу.
ИшхIелла замана даргантас ва миллатлис гIяхIдешуни дирули, дурабуркIуси гьарил балбуц гIеббурцули, сабира Дагъиста Халкьла Собраниела депутатуни биубли хьалли, гIядатла адамтачил цабалгунти, илдала мурадуни детерхахъес гьалакти, гIя­датуни дузахъули хIеркабирутала къяйлизиб нуни бегI гьалаб гьанбушес рирус ГIямаров Шамил ХIяс­буллаевич, Мя­хIяммадов ХIябибуллагь МяхIям­ма­дович, Булатов ГIусман Шамилович, ХIясанова Узлипат ГIусмановна. Илдани нушала газета гIеббуцесра хъумуртули ахIен, бирусигъуна кумек гIеббаахъили, газета бучIантачи баахъес къайгъи дакIубирули саби.
Республикализир кадиркути аги-кьяй­дала дайлаб багьарбирути илдани иш дурхъаси Рабазан базлизирра гIяхIдешуни дирес даимбиубли саби. ХIера, гьалабванра ГIиса Идбагла (гI.с.) уличилси динна Центрлизиб адамти дубкабатахъес дура­бур­кIу­си балбуцлизир Шамил ГIя­ма­ровли ва ХIябибуллагь МяхIям­ма­довли жигарла бу­­тIакьяндеш дариб. Ил балбуц бетерхахъес халаси кумек бариб илдала барх­кья­ба­ни­­ра (депутатунани).
«Гьар дус илдигъунти гьунибаънибачив къаршивиркес, рухIлашал гьалабяхI башутала лугIи имцIабикIни чебиэс дебали дигеси саби. Наб халаси разидеш бихули саби илди­гъунти анцIбукьунала сиптакарчи ветарнили. Дурхъаси базлизир Аллагьли (с.т.) лебталалра дубдуцибти ва гIяхIти баркьудлуми кьабулдараб», — викIи ХIябибуллагь МяхIям­мадов.
Лебилра цалабикибти Рабазан баз бехIбихьниличил мубаракбирули гъайухъун Шамил ГIямаровра.
Илаб лебтасалра дубкабатес ва дарх дехIибала даресра имканбакIиб. ГIядатли бетаурливан, культурала-багьудлуми тIинтI­дирнила программара гьалабихьилри.
ДахъдикIаб гIяхIти баркьудлумира, илди дурадуркIахъес имцIадикIаб гьарилла уркIилизир гъира-иштяхIра!

Нушала корр.