Дила узи МяхIяммадра рузи Шагьризатра хIербирули саби МяхIячкъалализибси Редукторный поселоклизиб. Ил мерличиб бузули саби республикализиб бегIлара гIяхIтала лугIилизи кабурхуси шагьарла цаибил клиническая больницара.
МяхIяммадли ва Шагьризатли чуйнара иб: «Сен хIушани хIелукIулрая Ахъушала шилизибадти кIелра Шамилличила? Дебали багьудичебти, чула санигIят жагали бяркъурти тухтурти саби илди кIелра, чум лебал илдас баркалла бикIути адамти! Газетала хIурмат ахъбираргу илдигъунти гьарли-марти гъубзни гапбарадалли!».
Илдала буру­силичи лехI­ризурли, ил­дигъун­ти тухтур­та­чила Ахъушала районна халкьлизицунра ахIи, цахIнабли даргантазира — «Зама­на» газета бу­чIан­тазира балли багьахъес хIяжатли саби или, ма­кьа­ла белкIес хьулрухъунра.
…МяхIяммадов Шамил ДаудхIяжиевич узули калун Ахъушала районна больницализив, Дагъиста Пачалихъла мединститут таманбарили гIергъи, 1998 ибил дусличивад 2017 ибил дусличи бикайчи, хирургияла отделениелизив. Илини районнизив узуси замана бахъал адамтала баркалла сархиб.
2017 ибил дуслизив Шамил МяхIячкъалализибси шагьарла цаибил больницализи узес шурухъун. 2022—2024-ибти дусмазив Иваново шагьарлизив учIули, ординатура хъараахъурли, больницала хирургическое отделениелизив хирургли узули сай.
«ЧебяхIси категорияла тухтур» ибси уличи лайикьикибси Шамил ДаудхIяжиевичли гIяхIцад ХIурматла Грамотара ва халкьла баркаллара сархибтири коронавирусла изала тIинтIбиубси замана. Дуги-хIери кьяшмачи тIашти, адамтала гIямру дерцахъес, чусра урехи лебли биалра, гъазализи каберхурти тухтуртала ургав Шамилра левсири.

«ГIяхIгъабза» или ирули бирар даргантани цархIиллис гIяхIдеш барес, къиян-жапа камдиахъес, гIямру гьамаддиахъес къайгъила вегIлис. Илгъуна кьиматличи бегI гьалаб лайикьли саби тухтурти, чулира илгъуна гьуни кьаскабарили чеббиркIути. Гьарли-марти гIяхIгъубзни биъни кIелра ахъушан тухтур — кIелра Шамил — гьанна даргантаницунра ахIи, цархIилти миллатла вакилтанира балули саби, илгъуна ахъси у калаб чула мурталрану!
БяхIяндов Шамил БяхIяндхIяжиевич, Ахъушала цаибил урга даражала школа таманбарили, керхурсири Дагъиста медакадемиялизи ва гIяхIти кьиматуначил белчIуди хъараахъур 2007-ибил дуслизиб. ХIябал дус МяхIячкъалализив «Къалабаси кумек»-ла кабизлизив узули калун.
Республикала клиническая больницализибси тумала (сосудистая) хирургияла отделениелизиб ординатура таманбарили гIергъи, авал дус хIянчи бариб Дагъиста кардиологияла ва уркIила-тумала Центрла хирургияла отделениелизиб.
2013 ибил дуслизив Шамил БяхIяндхIяжиевич живариб узахъес Грозный шагьарлизибси «къалабаси кумек»-ла больницализи. Илар илини дурадеркIибтири дахъал операцияби, сарира сагати тяхIуртачил дархдасунти ва «острый инфаркт миокарда» или ируси, адамла гIямрулис дебали урехиласи изала сагъбарес кумекли детарути.
Ил дуслизив «Врачи без границ» ибси уличилси халкьани-ургабси организациялизи кьабулварибсири, Франциялизиб мерлабиубси Центрлизив учIулира калун.
2015 ибил дуслизив МяхIячкъалализибси шагьарла цаибил больницала бекI тухтурли живарни багьандан, больницала эндовоскулярная хирургияла отделениела заведующийли узес вехIихьиб. Ил больницализир Дагъистайзир бегI гьалар дирес дехIдихьибтири «острый инфаркт»-ла шайчир операцияби.
БусягIятра Шамил БяхIяндов ил къуллукъличив узули сай ва бахъал адамтала баркалла сархили сай – сунела халаси багьудиличибли, уркIецIичевдешли, някъбала устадешличибли.
Россияла медицинала центртазир багьудлуми чедицIахъили, хирургияла шайчир дурадуркIути конференциябазир бутIакьяндеш дирули, илдачив сунени цаладяхъибти белкIаначил гъайулхъули, кIина Европала медицинала центртазив гьаркьяти тяхIуртачи бурсивирули калунси Шамил БяхIяндов лайикьвикили сай Чечентала Республикала Правительствола шайзивад ва Дагъистан Республикала БекIла шайзивад Баркаллала къагъуртачи, ХIурматла Грамотаби кьалли чумилра лер.
Адамтала гIямру уцахъули, дузути кIелра Шамил, хIуша Аллагьли гIердуцабая, гьатIира имцIабикIаб хIушаб баркалла бикIутира арали калаб хIушаб дигутира!

П.Маллаева