Ассаламу гIялайкум, дарганти!
Гьанна чумал дус Палестинала халкьличил кахти анцIбукьуни кадиркули сари. Буралли, нушани Палестинала адамти къирбирули чебиулра. Илдигъунти жяргати баркьудлуми дурадуркIули сари сионистунани (жугьутIунала хIяракатла шаликартани).

БусягIятра Палестинала ванзаличир вайти хIил­лаби кадиркули сари. КIел миллионцад адам гашазибад улхули саби. Илди саби бухънаби, биштIати дурхIни, чулахъуни ва цархIилти. Иличил барх гьар минут илди мер-мусаличи снарядуни кадиркули сари, илдала кьаркьлуми бутIнаддирули. ИшбархIилис верхIцIали азирцад адам кабушили саби, илцад дукьдуунти юртанала удибра лебал. Гьанна Палестинализир кадиркути анцIбукьуни нушала умматлис халаси мусибат саби.

Гъамли багьурра Газализивадси журналист, ца­гьатIи вархкья, сунелара социальный сетани нуни хIердирули калунси, вебкIили сай или. ГIямрулизивад шалгIевухъес гьалаб хIера илини се белкIил дунъяличи сунела дугьабизлизиб:

«Al Jazeera-ла журналист Анас аль-Шарифла васият
— Иш дила аманат ва бегIлара гIергъиси дугьабиз саби.
Илди дугьби хIушачи даили сари, багьирая: Из­ра­гIиль бажардибикиб ну кавшес ва дила тIама къябаэс.
—ХIушаб даршудеш, Аллагьла уркIецIи.

— Аллагь бикьри сай ва илини балуси саби, севан нуни лерилра цIакьани харждарирал дила халкьла хъарихъли ва тIамали ветаэс.
— Ну вирхулри Аллагьли дила гIямру духъяндирниличи, ну дила хъалибаргличи ва гъамтачи нушала ахIерси шагьарлизи — дявила цIакьличил буцибси Ашкелоннизи (Маджад) — чарухъес имканбикIниличи. Амма Аллагьла кьадар чедибухъун.

— Нуни чуйнара децI-шишимти чIямдарира. Илкьяйда биалра цалра бархIи васвасъала адхIекIуб хIякьикьат са­би лебсиван гьалабихьес — къалпдеш агарли. Ну вир­хулри, нуша къирдирнилизир бутIакьяндеш дирутас, лехI­ка­хъи­ли буутас, нушала дурхIнала ва хьунул адам­­тала ли­га-­кьякьяличи авараагардешличил хIер­би­­­кIутас, дусра бай­хъалара заманала бухIнаб нушала халкь кабуршни тIа­шаэс къайгъихIебарибтас Аллагь бикь­рили ветарниличи.

— Нуни хIушачи хъарбирулра Палестина — бусурмантала тажличиб дурхъаси къаркъа.
Нуни хIушази хъарбирулра илала халкь, даршули хIер­биахъес ихтиярлизибад мяхI­румбарибти, чучи гуж­-­зулму дяхIчиаибти дурхIни. Илдала умути чарх-бекI Из­рагIилла бомбабани ва ракетабани даргаили сари.

— Нуни хIуша жидирулрая лехIкахъили хIедуахъес ва илди ванзурби азаддалтнила гумили детаахъес.
— Дила хъалибаргличира хIеруди барахъес хъарбирулра.
ХIушачи хъаррирулра дила нана хIуливан ахIерси рурси Шам. Ил халараили чераэс хьуликIуси наб ил барес кьадархIебиуб.
ХIушачи хъарирулра дила гIязизси урши Салах, сайра чIу­мавиайчи нуни гIевуцес ва мурталра мякьлав виэс ди­гуси. Илини дила гьуни даимбиру.
— Нуни хIушачи хъаррирулра дила дигуси неш, суне­ни­ра дила гьарил ганз балгаличил гьуниббалтуси. Илала балга-дугIя дила къалали дирутири, илала шала — дила гьунили. Аллагьлизи улгулра илала уркIилизи сабур хьурабиахъес.

ХIушачи хъаррирулра дила гIямрула рархкья, дигуси хьунул Умм Салах Баян. Дергъли нуша кIелра духъянти бузрас декIардикахъира. Амма ил, зайтунна галгала ар кьяйдали чIумали каризурли, Аллагьличи хъаряхъили калун, ну мякьлав агнила жавабкардеш бирхаудиличил дихули.
— Нуни хIуша жидирулрая илди-алав уржахъес ва, лерилра секIал сунела арилизирти ва ахърилизирти, дурхъаси Аллагьлис гIергъи, илдас хъарихъли детаахъес.
— Эгер ну вебкIасли, дила бетуц-кабизлизив чIу­ма­си­ли убкIус, Аллагьла гьалар илала кьадарличи ра­зили виънилис бикьридеш дирули. Вирхулра Иличил гьунивиъниличи ва Аллагьла лерилра секIал гIяхIти ва даимти диъниличи.

— Аллагь, ну гIязаблизибти-ургав кьабулвараба, дила лерилра бунагьуначивад чевкархи, дила хIи нушала халкь ва дила хъалибарг азадбалтниличи гьуни шалабируси нурли детаахъа.
Дила чеасла таманбарни, варсхIевиубли ва васвас­хIей­кIули кални багьандан, набчи ур­кIе­цIи­ба­ра­хъес дул­геная.
— Газаличила хъуммартидая…

ХIушала балгназиб набчилара хъуммартидая»
Анас Джамаль аль-Шариф 06.04.2025
Халкь къирбирес даимбиубли саби.

 

ГIябдуряхIман ИсмягIилов