ИшхIелла наслулис игитуни чIянкIли жузазиб ва хабуртазиб бирути саби или гьанарусиван билзан. Илди бусягIятла манзиллизиб нушала гIямрулизибра биэс бирни пахрубаресил анцIбукьлизи халбаресра вирар. ГIяхIгъабза чинав ва сегъунти манзилтазив алкIули виаллира, ил даимлис халкьла уркIбази заклизи зубариван минавирусира сай. Иш гьакIлис илгъуна багьадур Дахадаевла районна Меусишала шилизивадси Мусабек Мусабековличила сари гъай.
Гьалабван Меусишала школала бучIанти иличил гьунибаиб. ЧебяхIси Чедибдеш 80 дус бирнила байрам гъамбикIухIели, илгъуна гьунибаъни шила дурхIнас хъумхIертесилира бетаур.
Мусабекличил барх гьунибаъниличи бакIиб школала директор Сулайбан Ризванов, шила бекI МяхIяммадрасул Сулайбанов ва дявила-белчIудила шайчивси хIянчизар ГIяли ГIялиев.
Гьунибаъни дураберкIибтани бургъантала гьар бархIила гIямруличила видеопрезентация хIядурбарилри. Ил дурхIнас гIяхIбизнира багьеслири. Экраннизир бургъантала учениябачила, гьар бархIила диркьу-далтутачила, гIярмиялизир лергIер хIяжатти узидешла бархбасуначила ва цархIилти бетуцуначила кадраби чедиахъулри. Презентацияли солдатунала гIямру секьяйда детурхулил белгидируси «мицIирси сурат» гьалабихьилри. ВегIла улкала хъархIерагардеш балтахъантачила баянти дагьес кумеклира детаур илди далилти школала бучIантас.
Мусабек Мусабековли дурхIнас сунела дявила гьуниличила, хъалибаргличила баянти гьаладихьиб. Илини илкьяйдали буриб сунени ургъанна санигIят чеббикIес багьандан виштIахIейчивадли касибти бяркъла далилти кумекли детаъниличила.
Ургъанничи дурхIни халаси иштяхIличил лехIбизурлири ва суалти дедлугулри. ИмцIаливан дурхIнани вягIда хIясибли къуллукъбирниличила суалти дедлугулри.
Школала бучIантас дявила анцIбукьуни кадиркути мер-мусаличибти адамтала бургъантачил сегъунти бархбасуни лерал багьес дигулри. Мусабекли цабехIли цабехIла иргънила ва хIурматбирнила гIяхIдешли илабти адамтачилти бархбасуни вайти ахIен или баянбариб.
Бургъантачи чевкъути къияндешуначила дурхIнала суалтас жавабли диахъубли, М.Мусабековли гьарил секIайчи ункъли хIядуриубли виэс хIяжатли биъниличилара гьанбушиб. «Биалра, къияндешуначи хIерхIеили, бургъантала ургарти гьалмагъдешла бетуцунани сегъунти-дигара гьалабизуни урасахъес имканбикIахъули саби», — буриб илини.
Мусабекли дурхIнас баркалла багьахъур илкьяйдали бургъантачи ва илдани къуллукъбирниличи халаси пикри бяхIчииънилис. Ил викIи: «ХIуша ункъли дучIули ва хIушазивадли гьарил вегIличи вегI вирхусили ветаурли дигулра наб. Хъуммартидая дурхIни, хIушазивадли гьарил нушала улкала челябкьла сай. Чекадизурли дучIеная, кьуватчертили диэс къайгъибарая, хIушала пикруми детерхахъес кьаслизи кадизирая. Гьалмагъдешла ва цадешла бархбасуни дебали мягIничерти сари, илди диалли, сегъунти-дигара къиянти чекасес вируси сай. ЦIакьтили ва малхIямтили диирая, цалис цали кумек гIеббиахъеная, вегIла команда гIеббурцесра къайгъибарая. ХIушачи ну вирхулра. ХIушаб къаркъагъуна арадеш, белчIудилизир чедибдешуни ва гIямрулизир гьарбизуни диубли дигулра!»
Гьунибаъниличиб мягIничебси анцIбукьли бетаур ЧебяхIси ВатIа дергълизиб ва СВО-лизир бутIакьяндеш дирухIели, улкала хъархIерагардеш балтахъули, чула гIязиз жан кьурбандарибти гIяхIгъубзни гьанбиркахъули, минутла манзиллис лехIдеш багьахъни. Ил баркьудили гьандиркахъулри даршудеш сархес багьандан сецад гIямру къябаибтирил ва бебкIали сегъуна децI хьурабирахъулил.
Балбуц ахирличи биркухIели, лебтанилра сурат касахъиб.
«Ургъанничилси гьунибаъни бучIантас мягIничебси дарсли бетаур. Илдани пахрубиру чула хала бегIтачицунра ахIи, ишхIелла манзилла игитуначира. Илдигъунти гIяхIгъубзначи сабира мешутили бетаэс кьасбиру илдани. ВегIла ахIерси ВатIан багьандан гIязиз жан кьурбандарибтачилара даимлис хъумхIерту. Мусабек Мусабеков илдас мицIирси бикьрили ветаур рухIлашалси чебяхIдешла, гъабзадешла ва ВатIайс мардешличил къуллукъбирнила. Челябкьлализиб ВатIан балтахъантили сабти дурхIнала уркIбазир ил багьадурли патриот бяркъла кьадричебдешла мурхьти къел датур», — буриб школала директор Сулайбан Ризвановли.
Дахадаевла районна администрацияла пресс-служба
