Дигалра хIейгалра илгъуна суал алкIахъули саби онлайн жузи гьаннала заманализир бархIиличи-бархIи машгьурдикIнили, библиотекализи бякьи жузи дучIути адамти гьачамличиб-гьачам камбикIнили. Нура цацахIели иличила пикририкIули рирус. СенахIенну гьаннала замана гIяхIцад тамашала секIулти кадиркули сари. Замана барсбикIуцад Интернетли гьар секIал сунела арилизи дуцили сари. Интернетлизи ухIнаухъалли се-дигара баргес вирули сай. Амма, буцес бирар вара Интернетли кагъарла жузла мер? Дила пикри хIясибли, Интернетли гIядатла жузла мер хIебурцу.
Жуз учIанна гьалаб гьаргбируси арагIеб дунъя саби, суненира тикрархIебируси аги кабилзахъуси, жагадешла хIялани иргъахъуси ва уркIила гьав ахъбирахъуси. ХIера, жузлизирад сари учIанни мурхьти багьудлуми кайсути. Жузли адам тIашизахъес, пикриухъахъес, уркIила хIялани мурхьли аргъахъес витIикIуси сай. Жузлизирад делчIунти адамла дагьрилизир даимлис минадиубли кавлути сари. Гьайгьайрагу, Интернетлизиб нушани се-дигара баргес дирулра. Амма, бучIуси жузла кагъарла тIем, садирхъути кIапIри экранни нушаб гьалахIедирхьу. Иличи че, Интернетли хIулбасра заралбиру делчIунтира бекIлизир дахъхIи хIедуар.
Жуз чинаб-дигара белчIес вирар, илис вай-файла хIяжатдеш агара. Жузли белчIунсила мягIна иргъахъес, секIал ахтардибирахъес, цугбурцахъес бирсиируси сай, иличивли адам гIякьлу-дагьрилашал гьалавяхI вашахъули. Интернетли биалли гьар секIал хIядурли гьаладирхьули сари, адам пикриухъахъесра мер хIебатурли.
Жуз багьудлумала урунж саби, суненира учIаннизи шараб-шинниван милиги ихъахъуси. Илар декIар-декIарти темабала черкадти багьахъниби, баянти гIялимтани ахтардидарили, гIямрулизир кадикибти анцIбукьуначил дебадарили, гьаладихьили сари. Жузли адам тарихличил, гIилмуличил, искусстволичил тяниширу, адамлизи сагаси секIал гьаргбирахъу. Интенетлира багьудлуми гьаладирхьулигу, амма ташмишдеш алкIахъути багьахъниби дахъал сари. Илдазибад чидил бархьсил, чидил къалпла сабил декIарбарес гьарилли хIебала.
Жузли адам бархьдеш дигахъес, гIяхIдеш бирахъес, гъабзадеш дакIудирахъес, уркIецIичевсили вирахъес, вайсира гIяхIсира декIардирахъес бурсииру. Интернетлизи ухIнаухъалли, дунъя хIекьли кьяркьсили, инсап-хIяя агарсили чебиахъули саби.
Интернет илцадра вайси саби рикIесра хIерирус, леб илизибра пайда. Нушаб хIяжатси багьахъни хъярхъли баргес дирулра, халаси къиян кахIебихьили. Кинобачи хIердикIес, далуйтачи лехIирхъес дирулра. Амма илини жузла мер буцес хIебирар. Илар дучIути жузани кагъарла жузаниван разидеш хIебиху.
Интернет сецадла гьалабяхI башалра, сагати технологияби дакIудулхъалра, жузли кьяйда дунъя аргъахъес ва гIямрулизиб вегIла мер буцахъес селилра кумекхIебиру. Ил багьандан жузи нушала гIямрулизирад детхIейхъниличи рирхулра.
ПатIимат Мирзаева
