ГIяхIти баркьудлумала халаси кьадри лебси саби. Исламла дин хIясиблира Кьуръа имцIатигъунти аятуназиб гьанбуршуливан, гIяхIти баркьудлуми дурадуркIути адамти ЧевяхIсилис бегIлара дигути ва ахIерти саби. «Хясала писцадалра гIяхIдеш барибсини, ил чебиу» или бурули саби Кьуръайзиб, адамлизибад дурабухъунси камси-биалра гIяхIси баркьуди дугIли бетхIейхъниличила иргъахъули.
ГIяхIбаркьунани илцадра халаси цIакь бухIнабурцули саби, хIятта илдала кумекличил арагIебли дунъя гIяхIбухъахъес имканбикIули саби. Гьарли-марли, гIяхIбаркьуни дируси адамли Аллагьла гьалаб даимси дунъялис (ахиратлис), гьар бархIи имцIабикIуси напакьа бурчули сай, цархIилван буралли, илини сунес шаласи челябкьла хIядурбирули сай ва сай-вегIси «гIяхIбаркьунала кьани» чебирцIахъули сай. Иличибра пайдаласи ва гIяхIси секIал биэсра хIебирар иш дунъяличиб.
Нушала Идбагла (с.гI.в.с.) асхIябтала гIямрулизирад касибти дахъал мисалти гьандушес вирар, илдани чула лебдеш, бегIла гIергъиси кьацIла кесек булан бусурман дин багьандан, халкьлис гIяхIдешлис бедлугниличила.
Илдигъунти адамти ишбархIира къаршибиркни дебали дигеси анцIбукь саби. Ахъушала шилизивадси ГIялиев МяхIяммад МяхIяммадовичли баягъи шила дублабси «ГIелахIеркI» бикIуси мерличиб юртани лушнила шайчибси база балкьарахъули сай. Илала гъай хIясибли, ил халкьлис дебали манпагIятсили уббулхъан, сенахIенну ил базализир хъулри лушантас хIяжатдиркути декIар-декIарти станокуни (харрат), хасти гIягIниахълуми кадихьес кьасбарили сай. ХIера, илди гIягIниахълумала кумекличил адамтас хIяжатти журала хIянчурбира детурхахъес гьамадли бирар. Амма МяхIяммад ГIялиевли буруливан, бекIлибиубсигъуна, тIашбатес кьасбарибси юртани лушнила шайчибси база бузес бехIбихьибхIели, илизибад лябкьуси хайрила шел бутIализибад ца бутIа, цархIилван, арцла кьадар халкьлис гIяхIдешлис, мискин-пякьиртас закатлис харжбарес пикрибарни саби. Илкьяйдали бакIибси хайрилизибад закатла пай СВО-лизиб алхунти бургъантала хъалибаргунасра бедлугуси саби.
МяхIяммадли сунела уршбира кирила баркьудилизи битIакIили сай. Илданира дудешла гIяхIти кьасани гIердурцули, илди детерхахъес багьандан чула шайзибадра пай кабирхьули саби.
Иш дурхъаси базла бехIбихьудлизиб МяхIяммад ГIялиевла гIяхIбаркьла балбуц лебилра даргантас, бусурмантас ЧевяхIсила разидеш сархнила гьунчиб гIибратли бетарули саби. МяхIяммадлис ва илала уршбас чула шалати, гIяхIти кьасани детерхахъес сархибдешуни ва арадеш дулгулра!
ГIяхIбаркьунани адамла бунагьуни ва хатIаби ицниличил дарх, уркIилис ва рухIлис паргъатдешра бихути сари. Илкьяйдали гьарилла гIямрулизирра гIяхIдешуницун дурадуркIахъес имканти гьаргдиаб…
Нушала корр.
