ИшхIелла заманала игитуни саби нушала ВатIан миллатчибазибад балтахъути гIяхIгъубзни – СВО-ла бутIакьянчиби. ВатIа ЧебяхIси дергъла манзил адамти дяхI-дяхIли гъармука-фашистуначи къаршили бургъутири. ИтхIелира нушала улкали дергълизиб дебали мягIничебси ва чебяхIси бяхIчибиз бетурхахъусири, дунъяличир тIинтIдирути гъармука фашистунала уряхIти хьулани, миллатчидеш урдикахъес, дячIес халаси гъаза барибсири. Россияли лебил дунъя фашистунала миллатчидешла кьялшубазибад берцахъибсири. ИшхIелира нушала улка тяп итхIеливан миллатчидешличи къаршили бургъули саби. Дунъяла лерилра улкни Россияличи къаршили кадизурхIели, ишбархIи дявила хасси балбуцлизир бутIакьяндеш дирути багьадуртани черяхIти игитдешла баркьудлуми дурадуркIули саби – ахIерси ВатIа хъархIерагардеш далтахъули. Улкала Президент В.В.Путинни мурталра сай гъайулхъухIели, чебетаахъили, пикри бяхIчиаили бурули вирар, тарихла бухъяндешлизиб гьачамалра Россия саби гIяхIъулали цалра улкаличи чебухъунси ахIен или. Россия чиди-биалра улкаличил бургъуси манзил илини, яра сунела дазурби ва хъархIерагардеш далтахъули, яра чебухъунтачи къаршидеш дирули калунси саби.
ХIера, улкала Президент сейкIулил ишхIелла бургъантачила: «ВатIа асилти уршбани Россияла урехиагардеш бихIнила шайчиб бекIлибиубси мурад бетурхахъули саби, гьайгьайрагу, илди улкализиб машгьурбиахъниличи ва чучила лебтазилра багьахъниличи лайикьбиркули саби. Дила пикрили, илдачила далуйти дучIес, назмурти цаладирхъес ва илдас памятникуни тIашдалтес хIяжатли саби. Илди – игитуни саби».
СВО-лизиб бургъути игитунани гьар бархIи сегъунтилра медальтачил, яра шабагъатуначил умцес хIейрути гьунарти дурадуркIули саби. Бахъал дагъистанлантанира ишбархIи дявила хасси балбуцлизир бутIакьяндеш дирули саби.
Илдигъунтазивад ца сай Шамилов Руслан МяхIяммад-Камиловичра. Дявила хасси балбуц бехIбихьибти цаибти бурхIначивадал ил миллатчибази ВатIан батахъес СВО-ла мер-мусаличи арякьун. Илис гьалавра Руслай Чечентала Руспубликализибси «Ахмат» отрядлизиб вягIда хIясибли, дявила къуллукъбирули левсири. Руслан Ахъушала районна ХIерхмахьила шилизив акIубси сай. Сай халаваибси хъалибарглизиб, хала нешлизибад, хала дудешлизибад илини кабизалачерти хIял-тIабигIятлашалси, адаблашалси бяркъ касиб. Школализив учIухIелира Руслан сай-алавтачи дигичевси, бяркъчевси ва залумси уршири. Ил бархьдешгIевси, юлдаш-тянишличил цавалгунси, хIяжатбикибси мерлаб адамтас кумекбарес хIядурсили халаваиб. Дебали серхурси, дахъал гъай агарси, кагибти адуцалаличилси жагьил адам лебтанилра хIясибвирусири. ХIера, ишбархIира Руслай СВО-ла мер-мусаличив цархIилтас кумеквикIули, дявила декIар-декIарти частанази ярагъла ва цархIилти хIяжатти масанала дехла машинаби дикули, сунезибад лябкьусигъуна кумек гIеббиахъули ургъули сай. Руслай дявила къуллукъбируси артиллерияла полклизиб (тупала гIяскар) сунечил барх дагъистанлантира бургъули саби. Тамаша ахIену гьатIи, сунелагъуна у бихуси, илала тухум Руслан Шамиловлира дявила хасси балбуцлизир бутIакьяндеш дирули сай.
Сунечи хъарси дявиласи хъарбаркь бетерхахъес багьандан Руслан МяхIяммад-Камилович чина-дигара виуси сай. Дявила бутIакьянчибала чедибдешуни дейгIес хIейрар, илкьяйдали Руслайра гьар бархIи дявила бутIакьянчибас кумеквикIниличил ВатIайс мардеш чедиахъули сай. Сунечи хъарти къуллукъуни жавабкардешличил детурхахънилис Руслан Шамилов чуйнара-сера пачалихъла шайзивад шабагъатуначи лайикьикиб. Дявила къуллукъбируси манзилла духIнар илини 8 шабагъат касиб, илдазирад 5 — СВО-лизир бутIакьяндеш дирнилис сари. Р.М-К.Шамиловлис дедибти шабагъатуни-ургар лер ишдигъунти: «Дявила асилдешлис» бикIути цаибил ва кIиибил даражала медальти, «Дявилизив асилдешличи декIарухъни багьандан» бикIути цаибил ва кIиибил даражала медальти, «Суворовла уличилси медаль», «КТО-лизир бутIакьяндеш дарнилис», «Дявила хасси балбуцлизир бутIакьяндеш дарнилис» ва цархIилтира.
Дявила майдайчирти кьяркьти аги-кьяйдализирра разити анцIбукьуни къаршидиркни дигеси саби. ГIямрула ца гьунчибад башути ва цагъунти бяхIчибизуни чула кьибламали детаахъурти сеннира цали ца бургути сабигу. Илкьяйдали бетаур Русла гIямрулизибра. Гьанна илала гIямрула рархкьяли ретаурси Лилия дявила хасси балбуцлизир бутIакьяндеш дирутас гуманитарный кумек гIеббиахъуси кумекчибала (волонтертала)кьукьялизи карурхусири. Цалис ца гIяхIбизурти жагьилтани чула кьисматуни цадарес кьасбариб. Дявила аги-кьяйдализиб биалра илди хъайчикабииб. Гьанна илди кIелра барх ВатIан багьанданси гьунчиб бузули, чедибдеш гъамдирахънилизи саби-бегIси пай кабирхьули саби. Нушала шайзибадра Русланхъала жагьилси хъалибарглис талихI ва даршуси заклиурти эркинти, баракатчерти гIямру дулгулра! ХIушагъунти урехиагарти, ВатIайс марти ва чула гIямру улкала черяхIти мурадуни детурхахънила гьунчи каибти хъалибаргуни лералцадхIи, нушала челябкьлара шаласили бетарар.
П.Сулайбанова
