Дагъистанланти Интернетлизиб лебтанилра ца­ван чебиули саби: гьими-кьясличилти, кьяркьти дал­дуцунала шаликарти (радикалы), мурталра къал­­ма­къарли биркьути ва чIумати гIядатуни дузахъути. Ил­ди­гъунти адамти саби Дагъистайзиб или гьанбиркули саби цархIилтас, республикализи хIе­ба­кIибтас.
Амма ил бархьси пикри ахIен. Сепайда, Ин­тер­нетлизи гIяхIси анцIбукьуначила камли лукIа. Амма сегъуна-биалра вайси анцIбукь кабикалли, илала аги-кьяйда хIедагьурли, хъярхъли Интернетла душилизиб багьарбирахъу.
Дахъалгъунти илдигъунти хабурти Дагъистайзиб хIер­бирутани ахIенну лукIути, Дубуртар Улка гьа­чамалра хIулбани чехIебаибтани сари. Ил багьандан саби лебилра адамтала Дагъистайзиб хIербирутачила ца балкIси, къяналаси пикрира. Амма илдани хъу­муртули саби ца секIайчила: Дагъистан – декIар-де­кIарти миллатуни уржили хIердируси республика са­би. Гьарил миллатла вакилтала чучи хасти мезанира гIя­датунира лер. Ишаб хIу чи миллатла вакил сайрил хIер­хIебикIули, кумек гIягIнили биалли, бу­сягIятал ил гIеб­баахъес гъазализиб бирар.
ЦархIилти республикабазибад, улкназибад бакIиб­ти гIяхIли нушала гIяхIялдешличи, кумекбарес гьалак­деш­личи, хIял-тIабигIятличи дебали та­ма­ша­бирар. Се­нахIенну илдас гьанбиркулри цар­хIил­ван, амма хIя­кьикьат ургIебли биъни чебиур. Иш анцI­букьлис балбикибси урус мезлизиб ца бурала лебгу: «Не суди книгу по обложке». Ил багьандан адам бара че­хIеваили, иличил ихтилатхIебарили, хIевагьурли, цар­хIилти се бикIалра, иличила вайси секIал бурес асу­хIебирар.

Ханум ГIялиева