Ахъушала шилизиб халкьла хIурмат сархили хIербирули саби ГIисаева Райсат Риз­ва­новна ва ГIямараев Казбек Шара­пу­динович. Илдани кьисмат ца­бариб­хIей­чирад 46 дус дикили сари.
Райсат Ризвановна, 1972 ибил дуслизиб мединститут таманбарили гIергъи, тухтурли рузули, сунела бузерила гьуни бехIбихьиб. БусягIятра ил рузули сари Ахъушала районна Центральная больницализир чейхъути излумала отделениелизир. Райсатли сунела бузерила гьунила манзиллизир дахъал шабагъатуни касили сари, илди-ургар лер: «ДР-ла хIурматла тухтур» бикIуси у, «ЧебяхIси категорияла тухтур». МалхIямси, зягIиптачи уркIецIичерси Райсатли районна халкь-ургаб халаси хIурмат сархили сари. Ил сунела хIянчиличи чекаризурли, зягIипти сагъбарес къайгъилизир рузули сари.
Казбек Шарапудиновичра Ахъушала ЦРБ-лизив шоферли узули сай. Райсатли ва Казбекли кIел рурси абикьур, гIяхIси бяркъра бедили, багьудира касахъили, гIямрула дякьличи дураиб. Халалгъуна рурси Шагьризатли институтра таманбарили, школализир учительницали рузули сари, риштIалгъуна Асият сунела неш кьяй­дали, тухтурла санигIятличи регI­риуб­ли сари.
2023 ибил дуслизир Асият Казбековна СВО-лизи аррякьунсири. Ил рузули калун Лугансклизибси дявила госпитальлизир.
Госпитальлизир рузули лералли, Асият бахъал Россияла бургъантас кумекриуб, бяхъибти, дяхъи-хъаслабиубти бургъанти сагъбарес гъазализир калун.
Асият ГIямараева РФ-ла Следственный комитетла шайзирад «Асилдеш ва гъабзадеш» бикIуси медальличил шабагъатларарили сари.
Асиятли сунела гIямрула вархкьячил барх кIел урши-рурси абилкьули сари.
Чула гIямрулизир сархибдешуни дирули, дигутани разибирули, хIербиэс кьадарбиаб илдас!

С.ГIябдуллаева