Ишди бурхIназиб Дахадаевла районнизиб гIярмиялизиб къуллукъбарахъес жибирнила кампания бехIбихьили саби. Дахадаевлара Хайдакьлара районтала дявила комиссар ГIумар СягIидовла гъай хIясибли, ишхIелла манзиллис 15 процентла кьадарлизиб призывникуни дугьабизурли саби. Илкьяйдали жагьилтазибадли камтицун бакIили саби медицинала комиссия дураберкIахъес багьандан.
Призывникуназибадли бахъалгъунти студентуни саби. Илдас ихтияр леб белчIуди даимбарес багьандан заманалис къуллукъбирнилизибадли акьубухъес. Амма призывникунас хъумартес асухIебирар призывная комиссияличи чараагарли бакIес хIяжатли биъниличила.
Дявила комиссартани гьарил призывникли ил кампаниялизир бутIакьяндеш дарес хIяжатли биъниличила балахъули саби. Хасси пикри бяхIчиаэс чебиркур гьанналауб медицинала комиссияличи хIебакIибтачи. ГьанбиркахъехIе, апрельла 10-личи бикайчи призывная комиссияличи хIебакIибтала сияхI участокунала инспектортази бедлугуси саби илди баргахъес багьандан. Илкьяйдали гIярмиялизиб къуллукъбарес гIелумбилзути далагардешуначи бяхIигур.
Призывная комиссияла председатель МяхIяммад ГIябдулкьадиров лебилра жагьилтачи дугьавизурли, багьахъур гIярмиялизиб къуллукъбарни нушала улкала ва жамигIятла гьалабси хIурматла баркьуди саби или.
ГьанбиркахъехIе, гIярмиялизиб къуллукъбарахъес жибирути саби 1995-2007-ибти дусмазиб акIубти мурул адамти, закон хIясибли чули къуллукъбирнилизибадли акьубатурти хIебиалли.
Адам гIярмиялизи хIевкахъести медициналашалти баянти белгидирути сари 23 ФЗ-53-ибти статьяби хIясибли, заманалис гIярмиялизи хIевкьяхъес ихтияр бедлугуси саби ил законна 24 ибил статья хIясибли.
Призывникунази балахъуси саби гьалаб кьяйдали повесткабала кумекличил. ЧеимцIа багьахъни бурхьуси саби заказной кагъарличил. Повестка бедниличила балахъуси корешок военкоматлизи баили гIергъи призывникличи баянти даили диъни марбируси саби. Повестка касили гIергъи адам дявила комиссариатлизи вакIес хIяжатси саби.
ГIумар СягIидовли аргъахъиб гIярмиялизиб къуллукъбирни гьанналаубсигъуна саби или — 12 базлис Россияла регионтази бурхьути саби, 2022 ибил дуслизир улкализи дархдикибти ахIенти.
«Призывникунани СВО-лизир бутIакьяндеш дирути ахIен. Призывникуни саби хIербирути мераначиб учетличи кабизес хIяжатси саби ва чина-биалра гечбиубхIели заманаличиб багьахъес чебиркур. Повестка кайснилизивадли гIелумизни административный тяхIярли яра РФ-ла УК-ла 328 ибил статья хIясибли уголовный тяхIярли жавабличи витIикIуси сай. РФ-ла Конституциялизиб чебаахъиливан, ВатIан балтахъни – гьарил адамла чебла саби», — буриб илини.
Дахадаевла районна администрацияла пресс-служба
