ХIурматла газета бучIанти!
Наб жявлил дигусири ил масъала ахъбуцес, амма уркIи гьаргли дугьаизес имкан агарсири. Гьанна илгъуна имкан леб, ва хIушачи лукIулра.
АхIерси районнизи ва шилизи, вякьунхIели, нуни нушала мер-мусала умачи пикри бяхIчииули вирус: секьяйдали нушала шимала, хIуркIбала ва цархIилти меранала уми шурдатурлил. Мурталра къантIси заманалис отпускличи шилизи вашни багьандан, ил шайчир чедихIяртдеш дакIудирулри, кьанни биалли, илавад арякьунхIели, иличила бекIлил хъумуртулри. Амма гьанна ну зумали дубурлизи вашулра ва мер-мусала умачи дебали пикри бяхIчииулра.
Нушала республикализиб чула хасти мезаначил, культураличил, хасдешуначил ва дахъал даршдусмала тарихуначил декIар-декIарти миллатла халкь хIербирули саби. Нушаб илди, хаслира – нешла мез, мяхIкамли калахъес дигули диахIелли, ил масъалара хIербарес чебиркур: нушала аслу-минала мер-мусала уми калахънила шайчибра хIянчи дураберкIес. СенахIенну цацабехIти хIякимтала хIеруди чебетхIебаъниличибли, «ХАЛА ХIЕРКI» (шурбаталли, халаси хIеркI), сен-сабил «ХАЛ ГОРК» бетаурли саби. Нуни минутлис гьанбикахъира, пикрибарира, дила виштIаси набчи гъамиубли, «ХАЛА ГОРК»-личи укьес асубирару или хьарикIули. Бархьли буралли, ил селичила гъайикIулил нуни адхIергъесра вираси.
Илкьяйдали нушани нушала аслу-минализир лерти мер-мусала уми деткахъахъес асубирар, хIякимтани аргъбаибси масъалализиб хатIа уббатниличибли ва нушала авараагардешличибли. Илдигъунти аги-кьяйда сари Дагъиста цархIилти мер-мусала умачилра.
Илгъуна анцIбукь дахъал миллатуни хIердируси, рухIла халаси давлаличил машгьурбиубси республикализиб (сунезирра ЮНЕСКО-ла баянти хIясибли, дахъалгъунти мезани деткайхънила агиличирси) кабикес асубирусив? Дила пикрили, ахIен.
Ил багьандан лерилра муниципалитетунас мер-мусала уми лайикьси даражаличи диркахънила, нешла мезличи илди шурдалтнила, хатIаби гьардирнила шайчиб асарчебси хIянчи дураберкIахъес маслигIятбирулра. Нушаницун дирехIе хала бегIтани нушачи мяхIкамли баахъибси букьур чеалкIуси наслулизира гIебасахъес. Дахъал даршдусмала наслубала ургабси бархбас къяббердахъес нушазиб ихтияр агара!
ГIябдуряхIман ИсмягIилов
