РиштIахIейчирад нуни нушала ВатIа игитуначила балуси саби ва илдачи мурталра пахрура бирули рирус, чула жан ахIерахIедарили, душмантазибад улка берцахъес хIядурти гъубзни биъни багьандан.

Илди саби ЧебяхIси ВатIа дергълизир бутIакьяндеш дарибти бургъанти, сабира бахъал адамтас гIибратли бетаурти чула урехиагардешличил ва гъабзадешличил.

Гьайгьайрагу, гIядатла адамти-ургабра бирар игитуни, чулира сегъунти-биалра гьунарти дурадеркIили, мицIирти жан уцахъути. Илди саби полицияла хIянчизарти, тухтурти, цIа дилшахъанти. Чула асилси бузериличил ва чучи хъарти къуллукъуни жавабкардешличил тамандирниличил илди санигIятуначи бегIбиубтани адамтас халаси кумек бирули саби. Амма полицияла хIянчизарли, тухтурли, цIа дилшахъанни виэс гIягIниси ахIен игит ветаэс багьандан. Селичиралра гьалар адамлизир урехиагардешра гъабзадешра диалли, ил игит ветаэс вирар.

Гьаннала заманала игитуни саби дявила хасси балбуцла бутIакьянчиби. Илди-ургаб бахъал леб жагьилти, сабира бара гIямрула халаси гьунчи дурабухъунти. ВатIан батахъес дурабухъунти илдигъунти жагьилтасра гьарли-марти гъубзни саби дикIехIе.
Дила шилизибадра илдигъунти чумал гIяхIгъабза леб СВО-лизи арбякьунти. Илдазивад цали сайси Каримов Ибрагьим Шамиловичличила бурес дигулра наб макьалализиб.

Ил дявила хасси балбуц бехIбихьибти цаибти бурхIначивадал илав сай, жигарла бутIакьяндеш дирули.

И.Каримов акIубси сай Сергокъалала районна ГIяймаумахьила шилизив 1995 ибил дуслизив. Шилизибси урга даражала школа 2012 ибил дуслизиб таманбарили, МяхIячкъалализибси РГЭУ-лизи (Ростовла пачалихъла экономикала университет) керхурсири. Ил таманхIебарили, гIярмиялизи къуллукъбарахъес арукибсири. ГIярмия ахъили, хъули чарухъунхIели, сунела белчIуди даимбарес имканбакIиб. КIинайс Ибрагьимлис сунела дявила къуллукъуни даимдарес дигули ахъиб, ва 2020-ибил дуслизив, вягIда къулбасбарили, Чечняла Республикализи аркьули сай. Илав ил бахъал декIар-декIарти миллатунала вакилтили сабти, сайгъунти уршбачил тянишиуб.

Ибрагьим Каримовлис илкьяйдали Армениялизивра къуллукъуни таман­ди­рули калес кьадарбиуб. Илар да­кIу­дарибти гъабзадеш багьандан, илис «Кав­казлизир детаурти дявила анцI­бу­кьу­­нала бутIакьянчила» медаль бедибсири.
«Ибрагьим дебали серхурси, гIякьлучевси, лебтасалра кумекбарес хIядурси, халаси сабурла вегI, дигичевси, дебали гIяхIси урши сай», — бикIули бирар иличила гъамти ва тянишуни.

БусягIятла заманара дявила хасси балбуцлизир старший лейтенант Ибрагьим Каримовли жигарла бутIакьяндеш дирули, сунела ВатIа гьалабси чебла асилдешличил ихъули сай. Взводла командир сайливан, илини сунечил барх бургъути лебилра уршбачи халаси хIеруди биру. Ил сабабли Ибрагьим бархкьябасра дебали дигахъу ва илала халаси хIурматра биру. Сай Ибрагьим Каримовла гъай хIясибли, бархти уршбани илис хасдарили чумал далайра пикридарили ва дучIулира бирар.
Ибрагьим Каримов, дявила къуллукъуни тамандирухIели, чуйнара вяхъибси сай, кIина гарчкайубсири ва Москвала госпитальлизив кIел баз байхъала заманалис арадеш къулайбирулира калун. Амма, баралра къулайдеш акIалри, ил сунела хIянчиличи шурулхъусири. ХIера, илдигъунти къайкъбяхъести гIяхIгъубзни лебхIели саби нуша ишар паргъатли дузес ва хIердиэс дирутира.
Гьайгьайрагу, илгъуна серхурси, гьар секIайзив чеветаибси уршилис бяркъ бедлугнилизиб бекIлибиубси мер бурцуси саби нешлира. Илини саби ил бетуцлис хьулчира кабихьибси. Баркалла багьахъес дигулра Ибрагьимла нешлис илгъуна гIяхIгъабза айкьнилис!

БикIули бираргу, гьарилла сунела насаблизив, хъалибарглизив суненира иличибад гIибрат кайсуси игит вируси сай или. Ибрагьимлара хъалибарглизив лев илгъуна игит. Ил сунела хала дудешла дудеш Закарига МяхIяммадов сай. Ил Дунъяла Цаибил дергъла бутIакьянчи сайри, илкьяйдали ГIяякьакьализир детаурти дургъбазирра, Деникинна гъармукаба­чи къаршили, ургъули калунсири. Хала дудеш МяхIяммад МуртузагIялиев биалли, Че­бяхIси ВатIа дергъла бутIа­кьян­чи сайри.
Чебиуливан, Ибрагьимли сунела дебали цIакьси хала дудешла ва урехиагарси илала дудешла дявила гьуни даимбарили сай. Илдигъунти пахрубарести хала бегIтала уршира цархIилгъунали виэсра хIейрар. ХIера, ишбархIира Ибрагьим душмайс дяхI-дяхIли къаршидеш дирули, бургъантала гьала тIашдатурти мурадуни ихъули, гъабзадешличил ургъули сай. Баркалла биаб Ибрагьимлис ва сунечил барх, хъуцIарличи хъуцIари чебетаахъили, бургъути нушала асил уршбас! Жяв-жявли дургъбира тамандиубли, чула дигути хъалибаргуначи нушала гIяхIгъубзни чарбулхъниличи уркIи-уркIиларад дирхехIе!

Ханум ГIялиева