2025 ибил дусла сентябрьла 28-личирад октябрьла 2-личи бикайчи Грузияла Тбилиси шагьарлизир детерхурти ММА-ла абзаначив меусишан ХIяжи ХIяжиев дунъяла чемпион ветаур. Баягъи абзаначиб дунъяла 78 улкализибадти 800-цад спортсмен лебри.
2022 ибил дуслизив ММА-ла жагьилти мушлукьяби-ургав дунъяличив бегIлара цIакьси спортсмен декIарварибсири. Ил дарган урши ХIяжи ХIяжиев сайри. Сербияла Белград шагьарлизиб баягъи анцIбукьлис ХIяжис хасси Кубокра бедибсири. Илис гIергъи ХIяжи гьатIира гъирачеввиуб, гIурра чуйнара чемпион ветаур. БусягIятлис ХIяжини шуцIайчирад имцIали абзлизир бутIакьяндеш дарили сай. Илала бекIлидиубтигъунти сархибдешуни сари: ДР-ла чемпион – дявила самбо (2017 дус); ДР-ла чемпион – ММА (2017; 2018); Москвала чемпион – ММА (2019); Россияла чемпион – грэпплинг (2017); Россияла чемпион – ММА (2018; 2019); дунъяла чемпион – ММА (2019). Римлизир детерхурти абзаназир илини 16-17 дус биубти гIулухъаби-ургар бутIакьяндеш дарибтири. 84 кг битIакIлизибти спортсменти-ургав чемпион ветаур. ММА-ла дявила гъудурти журабазиб Европала жагьилти-ургарти абзаначир 2021 ибил дуслизиб Казаньнизиб цаибил мер буциб. ГIур арцла медаль сархиб ММА-ла дунъяла чемпионатличиб, сабира Болгария София шагьарлизиб бетерхурси.
2022 ибил дуслизив ММА-ла хIяйна чемпион ветаур: Дунъяла Кубок (командаби-ургабси), Азияла чемпионат, дунъяла чемпионат (ОАЭ. Абу-Даби).
Сербияла Белград шагьарлизир 2023 ибил дусла 12-18-ибил февральличир детерхурти абзаначив 21 дусличи бикайчити гIямрула жагьилти-ургав 93 кг.-ла битIакIлизив ХIяжи ХIяжиев ММА-ла дунъяла чемпион ветаурсири. ГIур панкратионна «Moscow open» бикIуси абзличив лебтачивадалра чедиикиб.
ММА-ла абзаначив 2023 ибил дуслизив (Албания. Тирана) ва 2024 ибил дуслизив (Узбекистан. Ташкент) дунъяла чемпион ветаур.
Сентябрьла 28-личирад октябрьла 2-личи бикайчити бурхIназир Грузияла Тбилиси шагьарлизир детерхурти абзаначив 88,4 кг битIакIла спортсменти-ургав ХIяжи сагадан дунъяла чемпион ветаур. Финаллизив ил къаршиикиб Казахстайзивадси мушлукьячил. Баягъи абзаначиб дунъяла 78 улкализибадти 800-цад спортсмен лебри.
Гьанна ил Бахрейн пачалихъла командализи керхурли сай. ХIяжи ХIяжиев хIядурвариб «КНК» (Khalid Hamad AlKhalifa) клубла тренерти Эсед Эмирагаевли ва Эльдар Эльдаровли.
ХIяжила бегIти Рабазан ХIяжиев ва ПатIима ТяймазхIяжиева Дахадаевла районна Меусишала шилизибадти саби. ХIяжи бусягIят хIерирули сай МяхIячкъала шагьарлизив. Дагъиста пачалихъла педагогический университетла физкультурала факультетлизив учIули сай. Урши айкьес ва бяркъ бедес халаси къиян кабихьиб дудешли, сенахIенну илала неш, ХIяжи хIябал дус виубхIели, гIямрулизирад шалгIеррухъунсири.
Спортлизив узес ХIяжи виштIахIейчивад вехIихьибсири. Бузериличи диги, гъира, иштяхI илис бегIтазирадра хала бегIтазирадра дакIибти дургар. ШапихIяжихъала насаб ил шайчиб гIяхIил бала меусишантани. Илала дудеш Рабазай Дагъиста пачалихъла педагогический институтла индустриально-педагогический факультет ва Дагъиста пачалихъла университетла юридический факультет делчIун, жура-журала хIянчурби дузахъули калун. Хала дудеш ШапихIяжи (сунесра илала хIурматлис бедибси у саби), къаркъала уста вирусири, вецIал кулпет абикьур, халабаахъиб ва мерлабариб. Халатани гьанбуршули бирар, ХIурцIима дубурла леслизи кадацIили чархIедирути колхозла чумал маза (мазала ил жинслис «къачагъ маза» бикIи) ШапихIяжини дурасибтири. ЦархIил чилра адам ила укьес виубси ахIенри. Чархлизив кункси, араси ва уруххIекIуси ШапихIяжини «Лисба къа» бикIуси леслизи, вайлизи гьаяра бигьи, адамти башуси гьуни гъятIхIебиахъес лац белшунсири. Илдала насаблизивадсири гIярабла гIилму делчIунси, пагьмучевси МухIяммадшапигIхIяжира, суненира ХIХ ибил даршдуслизиб «Мегъан шайх МухIяммад» бикIуси очерк-эссе белкIунси.
Дагъиста халкьла писатель Расул БяхIяммадовли ХIяжис ишгъуна назму багъишлабарибсири:
ХIела гьунар умцара
Ахъдеш хIебиур гIяршла,
ГIяшкадиаб дубурти
Чихъдеш умцес илала.
Ветаурри дунъяла
УркIбазив пахру халкьла,
ДакIударри игитдеш,
ГIялам мяштIкабиэсти.
ХIу сайри, ШапигIхIяжи,
БегIтас, шилис, Дагъистайс
Гьунарла хабар хибси,
Улкалис хIурмат хибси.
Даргантала гъабзадеш
Дунъялис гьаргдарири,
ГапхIейкIули адамдеш
Чихъли чедаахъири.
Баркалла викIулира
ХIу варкьибси нешлисра,
Вяркъурси дудешлисра,
Бурсивариб гъабзасра.
Муса БяхIяммадов,
ДГУ-ла Дагъиста мезанала кафедрала заведующий, филологияла гIилмуртала доктор, профессор
