ГIядатунани адам мурталра тамашаирахъули сай. Нушани илди гIядатуни дузахъулра, цацадехIти анцIбукьуназир илди селис гIягIнитил пикрилра хIедухъи. Амма цацахIели ишгъуна пикри бекIлизи башар: «Марлира, гIягIнитив адамлис гIядатуни яра илди гьаннала заманаличи чинаралра далхIедикибти, гьалар дузахъули калунтицун сарив?»

Дила пикрили, аслу-минала гIядатуни адамлис мурталра хIяжатти сари. Сен?

БегI гьалабси яргализир гIядатунани нушала убла манзилличил бархбасуни кадилзахъули сари. Илдала кумекличил нушани нушала тухумличил, халкьличил кадикибти тарихлашалти анцIбукьуначилара балулра.

Илала дурабадра, гIядатунани адамлизиб адаб-хIяя калахъес кумекбиру. Илдани нуша халатала хIурматбирахъес, гъамтачила пикридикIахъес, илдачи хIеруди бирахъес, цархIилтас кумекбирахъес бурсидирулра. Буралли, байрумтала замана ва гIядатуни дузахъухIели адамтани цалис цали гIяхIдешуни дирули, дигиличил ва хIерудиличил къайгъи дакIубирули бирар, малхIямдешра разидешра дарх дуртIули. Ил багьанданра бурес вирар гIядатунани адамличи мягIничебси асар бирули саби или.

Гьайгьайрагу, лерилра гIядатуни кьиматчерти сари викIесра хIейрар. Илди-ургар лер гьалар дузахъули хьалли, гьаннала заманаличи далхIедикибтира. Ил багьандан дузахъес гIягIнити сари бусягIятла заманара пайдалати ва адамтала гIямру къулайдирахъути гIядатуни. Илдигъунтани саби халкь-ургаб уржибдешра алкIахъуси ва мурталра барсбикIуси дунъяличир адамдешра кавлахъути.

Ханум ГIялиева