Сагаси Дусла байрамлис гьалав редакциялизи гьаввакIиб газеталичил цIацIали бархбасуни дузахъуси, дявила хасси балбуцлизир жигарла бутIакьяндеш дируси Расулов Юсуп МяхIяммадсаламович.
Иш яргализив ил арадеш къулайбарахъес замана бедили, хъули вархьилри. Нушани гьалабра буриливан, сай гIяхIъулали Россияла оборонала Министерстволичил вягIда бигьи, Ю.Расулов СВО-лизи арякьунсири. Гьанна ил кIинайс вяхъили сай, бусягIятла заманара арадеш къулайбирули госпитальлизив сай. Амма илини гьар отпускличи вакIибхIели нушачи гьаввакIес хъумхIерту. ХIера, гьалавванра госпитальлизи кайхьайчи газетала редакциялизи вакIиб, хIянчизартачил кам-гьамси ихтилатбариб.
Нушала бургъантала рухIла дебадешличила, дурабуркIуси баркьудилис мардешличила гьанбуршули, Юсуп Расуловли улкалис урехихIебирахънила ва илала хъархIерагардеш балтахънила мягIничебдешличила буриб. Дявила къиянти шуртIразиб бархкьябала икьала сецадла дурхъасил аргъира нушани илала гъайлизибад. Илдигъунти дявила юлдашуни лебхIели саби Юсуплисра гьужумла цIализивад дураухъес имканбикIуси.
Гьалабра бурили хьалли, гьаннара тикрарбирис: Юсуп МяхIяммадсаламовичла дявила гьуни 1999 ибил дусличибад бехIбихьибсири, Дагъистайзи ярагъладиубти халкьани-ургабти къачагъунала кьукьни духIнадерхурхIели. Ю.Расуловли илдас къаршидеш дирнилизир бутIакьяндеш дарибтири. ГIяхIцад дусми ардякьи, дявила хасси балбуц бехIбихьибхIелира, ил шайчив калес хIейуб, сай гIяхIъулали ВатIан батахъес дураухъун.
«Замана» газетала хIянчизартачилси гьунибаънилизиб ургъанни душмайс къаршидеш дирнила гьалар-гьаларти къяяназиб къуллукъбирниличила, подразделениебазирти аги-кьяйдаличила буриб. ТIабигIятла кьяркьти шуртIрира къияндешунира ахъес имканбикIулри дявила юлдашунани цали ца гIеббурцухIели или багьахъур Юсуп Расуловли.
«Хандакьуназир хIердиэс багьандан, нушала нушаб шуртIри акIахъес чевкъули саби. Илар дебали пайдалатили урдулхъули сари шяманира, маскировочные сетанира», — викIи ургъан.
Арадеш къулайбарили гIергъира, ил сагадан дявила хасси балбуц бетурхути мер-мусаличи, подразделениелизи чарухъес дигнира аргъахъиб: «ВатIайс бегIлара хIяжатси замана нушани кумек гIебхIебаахъахIелли, гIур чили ил биру? ВегIла дявила бархкьябачил виънира, илди гIеббурцнира дебали мягIничебси саби. ХIера, илдигу дявила узидешра».
Улкала халкь паргъатли хIербиахъес къайгъибирути нушала асил уршби ва Юсуп сагаси дуслизиб Чедибдешличил хъули чарбухъи дигулра. Арали калабая, нушала манзилла игитуни!
