Мурталра алавчарси тIабигIят жагасили кабилзан сецад дахъал вацIурби, шиниша кьар, кьадуби лерли диалра. ГьатIиралра гIяхIси: илдани гьава умубирнира. Сецад галгуби имцIали диалра, илцадра гьавара умули бирар.
ХIушанира чебиуливан, адамла чедихIяртдешличил ириъ чум анцIбукь диуба республикала декIар-декIарти мераначирти вацIурбази цIадикнила. Илцадра хъярхъли тIинтIдикIути цIали гIяхIцад чIябурти кадуцибти вацIурби агардариб. Гьайгьайрагу, мякьларти шимазиб хIербирутас ил дебали халаси зарал сабри. Адамтасцуну, гьатIи, ил зарал бетаурси, вацIализир хIердирути мицIираглисра ил вайсили уббухъун.
ХIера, илдигъунти гьанагарти анцIбукьуни хIисаблизи касили, бахъал адамтани вацIурби сагадарес или галгуби удалтули чедиур. Илди хIянчи дурадуркIули сари декIар-декIарти далдуцунала дазурбазир. Лебтасалра багаласи баркьудилизи ахъибтани тIабигIятла жагадешра гIеббурцули саби. Иличи че, мархIяби халадаили, зурбати галгуби детаалли, илдани умуси гьавара алкIахъа.
Дебали гIяхIсири илдигъунти хIянчи нушала тах шагьарлизирра дурадеркIес. Шагьарла унхъри лерли хьалли, иларти галгубала лугIира илцад-декIар халаси ахIен. Шагьар биалли, бархIиличи-бархIи халабикIули саби, шагьарлантасра умуси гьава хIяжатсигу. Хъулри, юртани-алав сецад шинишдеш диалра, илцадла ил умусилира бетарар. Гьайгьайрагу, ил шайчир бекIлил хIянчи дирули ахIен викIесра хIейрар. СенахIенну чумал дус гьалар дагьардиубти шагьарла цацадехIти унхъразир удатурли сагати галгуби, мархIяби лер. Илди халадаалли, гьайгьайрагу, шагьарлантас халаси пайдара бетарар. Амма дигахъаси, имканти лерли диалли, гьундурала дубаначир, юртанала гьаларти азбар-гIяялизирра галгубала лугIи имцIабиубли. ИлхIели бирар умуси гьавара, пергер тIабигIятра.
Салимат ГIялиева
