Мартла 16-личибад бехIбихьили, 23-личи бикайчи Ярославльлизиб Россияла шашкабала шайчибси чемпионат бетерхурсири. Ил абзлизир бутIакьяндеш дариб спортсмен Бадрудин Рабазановлира. Ил сархибдеш Бадрудиннис дебали мягIничебсили бетаур, сенахIенну илини сунела устадеш гьаларра чедаахъибтири, МяхIячкъалализир детерхурти абзаназиб 3-ибил мер касили.
Б.Рабазановла командали хIязлизир ахъти устадеш ва чула цадеш чедаахъиб. Улкала декIар-декIарти регионтала цIакьти командаби лерри, амма нушала командали хIурматласи 3-ибил мер сархиб. Абзли командабазиб Россияла цIакьти шашкабала хIяз диганти цалабяхъиб ва иличирли мерани дуцес багьандан халаси гъираличилси абз бетаурсири.
Командала тренер Марат СултIановли буриб, сунела командала сархибдеш устадешла дурсрачибли ва чебетаахъили хIядурдеш барнилизиб сабри или: «Бадрудинни ва илала гьалмагъунани гьарли-марси спортсменна къиликъ чебаахъиб. Илдани чула дагьрицун ахIенри пайдаладарибти, къиянти хIязла тяхIяр-кьяйдализир чула хIял-тIабигIят ва пагьмурти гьаргдариб», —буриб насихIятчини.
Баягъи абзли Бадрудиннизи чебаахъиб сайра улкала цIакьти спортсментачил абзикIес вирни. Ил тяхIярли илала спортла гьунчиб ил абз бекIлибиубсигъуна бутIали бетаур.
Ярославльлизибси илала сархибдеш-сунелацунси ахIен, иличибли Бадрудинни Дагъиста шашкабала шайчибси спорт гьалабяхI аркнилизира пай кабихьиб.
Сунечила бурасли, Бадрудин Рабазанов Лавашала районна Чуни бикIуси шилизив 1965 ибил дуслизив акIубси сай.
Сай акIубси шилизиб школара таманбарили, техникумлизи учIес керхурсири. Кисловодсклизиб илини зооветеринарный техникум хъараахъур.
Илала гъай хIясибли, ил 2010-ибил дуслизив шашкабала хIязличи чекайзурсири. ИлхIели МяхIячкъалала хIулбазир нукьсандешуни лертала цалабяхълизи керхурсири. Костромализи ва Челябинсклизира ваиб ил командаличил, итхIели шашкабала Россияла кубок сабри.
Нушанира Бадрудин ва илала команда сархибси чедибдешличил (жарма сархниличил) мубаракбирулра. Илдас гIурра сагати сархибдешуни ва чула спортлизир гьарбизуни дулгулра!
Рабадан БяхIяммадов
