Гьалабван лебил Россияла «Россияла воспитательти» ибси конкурсла республикала бутIализир Дахадаевла районна Уркухъла шилизибси «Солнышко» бикIуси дурхIнала анхъла хIянчизартани бутIакьяндеш дариб. Ил конкурсли гьар дуслизиб школала гIямруличи ахIебаибтала багьудила учреждениебала гIяхIтигъунти вакилти цалабирхъути саби. ДурхIначил дурабуркIуси хIянчилизир чули пайдаладирути сагадешуни ва бузерилизир дирахъути сархибдешуни баяндарес имканти алкIахъули сари ил балбуцличир.
Ишдус конкурслизи 11 бекIлидиубти ва 3 хасти номинацияби кадерхахъурлири. ДекIар-декIарти багьудила учреждениебазибадти бутIакьянчибани дурхIначил дурабуркIуси хIянчиличила гьардизурти методикала бетуцуни гьаладирхьулри, дарсур устадеш гIерисулри.
Номинациябани баяндирулри декIар-декIарти педагогикалашалти бетуцуни – багьудила сагати технологияби дузесиъниличирадли дехIдихьили, дурхIни культуралашал ва патриот бяркъличи биркахъниличи бикайчи. БутIакьянчибани дурхIни творчестволашал гьалабяхI башахънила ва илди чучи саби бирхутили биахъес багьандан пайдаладирути далилти чедиахъулри.
«Солнышко» бикIуси дурхIнала анхъла хIянчизартани конкурслизир бутIакьяндеш дарнили, чула сархибдешуни чедаахънила дурабадли, хасти организациябала шайзибадли илди чихъли кьиматлабариб. Педагогунани балбуцличир дурадеркIибти ихтилатунала ва устадеш гIериснила гIяхIдешличибли гьаннала гIергъира ункъли бузес кьасбариб.
Республикализибадти лебилра хIянчизартазибадли 16 адам чедибикилри балбуцла баянти хIясибли. Илдазибадли 5 «Солнышко» бикIуси дурхIнала анхъла хIянчизарти саби. ДурхIнала анхъла заведующая Мусаева Жамиля МяхIяммадовнани коллективличил рузес бални белгибариб ва «Успешный руководитель» ибси номинациялизир цаибил мерличи лайикьрикиб.
Физическое воспитаниела шайчивси инструктор ХIясанов Мухтар МяхIяммадовичлира «Наставник – это призвание» ибси номинациялизиб цаибил мер сархиб.
Воспитатель ХIясанова Кумсият ЗубайрухIяжиевнани «Молодые профессионалы» ибси номинациялизиб кIиибил мер буциб.
Воспитатель ХIясанова Разият Кьурбановна «Успешный воспитатель» ибси номинациялизир цаибил мерличи лайикьрикиб. Воспитатель Ибрагьимова Сабият Рабазановнани «Лучший профессионал образовательной организации» ибси номинациялизиб кIиибил мер касиб.
Гьарил чедиикибсилис ведомствобала шабагъатуни ва савгъатуни дедиб.
«Солнышко» ибси дурхIнала анхъла хIянчизартала сархибдешунани саби педагогуницунра ахIи, чула биштIатас гIяхIти багьудлуми дедлугниличи бирхути дурхIнала бегIтира уркIичеббиахъуб.
Дахадаевла районна администрацияла пресс-служба
