Дагъистан игитти бургъантани дурадуркIути дунъя тамашабирахъути ва илдала гъабзадешла баркьудлумачил машгьурси саби. ИшхIелла манзиллизирра регионна багьадуртани СВО-лизир бутIакьяндеш ди­рули, гьунартала ва игит­дешла хабардер­ха­хъур. Дубуртар Улкала нартанани ахIерси ВатIайс мардешличил къуллукъбирни дацIти гъай ахIен, илдани чула дявилати къуллукъуни асилдешличил тамандирни баркьудлумазир чедиахъули сари.
Иш гьакIлис нушани ВатIай жиибхIели бусягIят илала хъархIерагардеш батахъес дураухъунси, гьарли-марси дубурлан сайливан чеахъибси Дахадаевла районна СутбукIла шилизивадси БяхIямма БяхIяммаевличила бурес дигулра.
Ил сархибдешуни багьандан Гъабзадешла авал орденничил шабагъатлаварили сай. Сириялизир, Грузиялизир кадикибти дявила анцIбукьуназир илини бутIакьяндеш дарибтири Украинализи укьяйчи. Илала игитти баркьудлуми ВатIай ахъли кьиматладарибти сари ва Дагъиста игитла уличира лайикьикибси сай. Гъабзадешла ордентала дурарадли, илала игитдешла баркьудлуми «Гъабзадеш багьандан», «Суворовла», «Жуковла», «Гъабзадеш багьандан» ибти кIиибил даражала медальтачи ва гIяхIцад цархIилти хIурматла лишантачи лайикьикибси сай.
БусягIятла манзиллизив БяхIямма БяхIяммаевли, полкла командир сайливан, асилдешличил СВО-лизир дявила хъарбаркьуни тамандирули сай. СанигIятлашалти устадеш ва бургъантас бекIдеш дирес ункъли бални чуйнара къияндешунази викибхIели, багаладиубтири дарган багьадурлис.
Ургъанна гIямрулизиб мягIничебси анцIбукьли бетаур илис Россияла Федерацияла оборонала Министерстволи 2026 ибил дусла февральла 5-личиб 252 ибил номерличилси ХIукму хIясибли, полковникла у бедни. Иличибли багьесли саби ВатIан балтахънила баркьудилизи илини кабирхьуси пайла ахъси кьиматличила.
БяхIямма гьала хили секIал пикри­бирниличивли, дявила хъарбаркьуни детурхахънила манзиллизир полклис бекIдеш дирес ункъли бажардииркули сай. БегIлара къиянси заманара Б.БяхIяммаевли бархьси баркьуди дураберкIили, гьала тIашдатурти масъултира ирзули сай. Бургъанти уркIичеббирнила ва уржахънила гьарли-марси гьавкьянала дебали мягIничебси къиликъличил вегIиубси сай ил. Лерилра гьалабизунира ихъули, ахIерси ВатIан багьандан жан ахIерахIедирули, къуллукъбирниличил илини мисал чебиахъули, бургъантира гьар секIайчи ункъли бур­си­бирули сай. Чула командир умут­­личил къакъбяхъесил ва бажар­дичевси виънили бургъантира ур­кIи­чеб­би­ра­хъу­ли саби. Заманалис гьалаб илис пол­ковникла у беднилира баянбирули саби илала устадеш ахъти диънилис. Иличибли багьеслира саби илини гIяхIсигъуна дявила начальник сайливан, ВатIа гьалабси чебла ламусличил ихъни.
Б.БяхIяммаевли нушала хала ду­де­шу­нала игитти баркьудлуми даим­ди­рули, ишхIелла манзиллизибра ду­бурланти адаб-хIяя ахъти, ламус-хатирли жагабарибти биъни марбирули сай.
Дахъал шабагъатуначи лайикьи­кибси илини гъабзадешличил къул­лукъ­бир­нила баркьуди Россияла жагьилти ур­кIи­чеббирахъуси мисалли бетарули саби.
Дубуртани гIяшулла дебш дархсили айкьурси даргайчи хъулиб СутбукIла школализир мугIяллимли рузуси неш ПатIимат Кьурбанова, рузби, гIямрула марси гьалмагъ ва кIел балугълахIебаибти дурхIя хIерли саби. Илала игитти баркьудлумачи пахрули бицIибти илдала пикруми ил чедибдешличил чарулхъниличила сари. Илди, гьайгьай, булгули саби сунела бархкьябачил варх гъамси манзиллизив ара-сагъли ил хъули чарухъахъес.
Чараагарли, чедибдеш нушала бирар. Нушазир илдигъунти умутуни алкIахъули сари Б.БяхIяммаевли ва илдигъунти цархIилти улкала марти уршбани.
Дахадаевла районна администрацияла пресс-служба