СирхIянти ламусличил ва гIяхIялдешличилцун ахIен бурибти, илди-ургаб гьарли-марти спортсментира саби.
Илис бикьрили детаур 2017 ибил дусличибад бехIбихьили, гIяхIбаркьла адам, бизнесмен, сунела гIямру бегIла вавалидяхъибхIели, кьисматли нушачивад арукибси ХIясанхIусейнов Зияутдин Муммуевичлис багъишладарибти, гIядатли детаурти футболла абзани, сарира Анжи-арена стадионничир детерхурти. Илдазир бутIакьяндеш дирули сари Ахъушала районна сирхIяла лерилрара-сера шимала командабани.
Абзаначила бурес гьалаб спонсортачила ва илди дурадеркIес сиптакартили бетауртачила чумал гъай дурес дигулра. Абзанала спонсорти сабри жявли гIямрулизивад шалгIевухъунси, меценат, бизнесмен Зияутдин ХIясанхIусейновла хъалибарг ва узи-урши. Ил лебилра улкализив машгьурси баркьудила адам, меценат, пергер гъабза ХIясанхIусейнов Мумму ХIясанхIусейновла урши вирусири. Муммули сунела шилис ва арагIеб сирхIянтас дарибти гIяхIдешуни илцадра дахъал сари, ца макьалализиб лерилра илдачила буресра хIейрар. ГIяхIцад гьундури, гумурби дариб, бахълис хIянчила мерани акIахъуб, чумра къияндикибсилис кумекбариб. Сепайда, убяхIси ковидла изай ил нушачивад арухиб. Илала ва хъалибаргла хIурматбирули саби ишбархIира лебилра шантанира дагъистанлантанира.
Абзани дурадуркIнилис сиптакартили сабри МяхIячкъала шагьарла спортла управление, Ахъушала районна администрация ва мурталра спорт гьалабяхI арбукес къайгъилизибти пергер сирхIянти: Санкт-Петербурглизивадси баркьудила адам Рабазанов Руслан МяхIяммадович, Каспийск шагьарла собраниела депутат БяхIмуд Рабаданов, ахъти дер­хIа­нала юртани лушуси компанияла ге­неральный директор ХIясбулла ГIяхI­мадов ва цархIилтира.
Абзани кIел бархIи духъяндитIун, чузирра 16 командали бутIакьяндеш дарибти. Дебали жигарчебси хIяз бетаур. Жагьилтала командаби-ургар мерани сархиб: 1-ибил мер – «НацIи 1» командали, 2-ибил мер – «Ливерпуль» командали, 3-ибил мер саби-ургаб бутIиб «НацIи 2» ва «Хурби» командабани. 40 дусличибра имцIали биубти бутIакьянчибала командаби-ургаб 1-ибил мер буциб Кьассагумахьила шила командали, 2-ибил — На­цIила, 3-ибил — Нахкила.
Чедибикибтас дурхъати савгъатунира арцла шабагъатунира лерри: цаибил мерлис — 200 азир къуруш, кIиибил мерлис — 120 азир къуруш, хIябиъибил мерлис — 40 азир къуруш. Илдала дурабад, дусла бухIнаб спортла декIар-декIарти абзаназиб чедибдеш сархибтира шабагъатлабариб. БегIлара гIяхIси футболистлис шабагъатлис айпад ва тап, судьябас ва тренертас савгъатуни дедиб.
Чедибикибти шабагъатлабарес ва балбуц гIеббуцес бакIилри Мя­хIяч­къа­ла шагьарла депутатунала собраниела председатель Хиби Кьурбанович ГIялиев, МяхIячкъала шагьарла спортла управлениела начальник МирзахIяжиев Мурад ГIисакьович, урибси боксер, Олимпиадала жармала медаль сархибси МяхIяммад-Расул Мажидов, Нахкила ва НацIила шимала бурги ва цархIилти.
Илдигъунти абзанани шими-ур­гарти юлдашдеш имцIадирахъу. Ил де­бали халаси пай саби ХIясан­хIу­сейновхъала хъалибаргли спорт гьа­ла­бяхI арбукес кабирхьуси. ГIурра илдигъунти абзани дурадуркIахъес ахърира арадешра дедаб чус Кьудратла ВегIли. Нушачибад шалгIеббухъунти Муммусра Зияутдиннисра Гьалжана кьадарбараб. БутIакьянчибас ва абзани дурадер­кIиб­тас биалли, чIумаси арадеш. Дирхулра, илди абзани рес­­публикала даражаличи адирк­ниличи.