ЧебяхIси Чедибдеш 80 дус бирнила байрамлис А.М.ГIяб­ду­ряхI­­мановла уличилси Ку­ба­чила ис­кусс­т­вобала школала пре­по­да­ват­ельтани ва бучIантани мягIничебси бал­буц ду­ра­бер­кIиб.
Илди гIяхIладли бякьун Дахадаев­ла районнизир бегI гьалар пионервожатая ретаурси багьудила рурибси хIянчизар ва бузерила ветеран Зайнаб ГIябдулжалиловна Ибрагьимовачи. Ил балбуц жагьилти устнас чула пагьмурти чедаахъес имканни бетаур.
Зайнаб ГIябдулжалиловна хабардерхурси педагог сари, суненира 66 дус шила дурхIни бучIахъули калунси. Ку­ба­чила урга даражала школали­зир ва школа-дурхIнала анхълизир ру­зухIели илини дурхIнала уркIбазир шалати гьанбикуни калахъун. ИшхIелира илдазибадли бахъалгъунтани ил дигиличил гьанруршули сари.
ДурхI­на­ни Зайнаблис чула някъбани хIя­дур­барибси савгъат пешкешбариб, дигиличил балкьаахъурси савгъат Зайнаблисра дурхъасили бетарни якьиннири.
Зайнабли сунени бяркъурти дурхIначи пахрули рицI­ниличила ва нушала улкалис Чедибдешла бархIила мягIничебдешличила буриб.
Ихтилат дебали кьадричебсили ва дурхIнала уркIби разидешлизи гIе­ла­ди­кахъибсили бетаур.
«БиштIати устнала савгъат жагасицунра ахIи, гьести гIямрула адамтачи дигила лишанра саби. Илдигъунти гьунибаънибала кумекличил чеалкIуси наслула вакилтас патриот бяркъ бедлугуси саби.
Ил гьунибаъни Кубачила искусствобала школала давлачебси тарихлизиб цагьатIи мягIничебси бяхIли бетарар. Илкьяйдали нушала шилизиб багьуди ва культура гьаладяхI дашахънилизи халаси пай кабихьибси адамла хIурматбирнила, илис лайикьси кьимат бедлугнила баркьудира саби ил», — буриб Кубачила искусствобала школала директор Раисат БяхIяммаевани.

Дахадаевла районна администрацияла пресс-служба