ИшхIелла гьар шайчибад бархибси манзиллизир ка­дир­ку­ти анцIбукьунани гIямрула лерилра шалубачи асар­би­рули са­би. Пагьмучебти адамтала творчестволис биалли, гьа­лабяхI ба­шес багьандан селра диргалахIебулхъан, ил­ди гьар бар­хIи сагасилигIиб умцIули бирар. Писательти-поэтуначила гъай­­икIалли, жамигIятлизир кадиркути далагардешуни, яра илар къаршидиркути сегъунти-биалра масъулти сагати произ­ведениебас, илар ахъдурцути темабас хьулчили де­тарули дирар. Тарихлизибад балуливан, пагь­му­чеб­ти адамтани бегIлара бархибси манзиллизир сар­ри ис­кус­ст­во­ли­­зир, яра литературализир диаб черяхIти произ­ве­де­ние­би ал­­кIахъути…
Даргала литературализив ишхIели бегIлара сабухъчевли узуси писательлизи гъай агарли халварес вирар Ибрагьим Ибрагьимов. Дигеси анцIбукьли бетаурли саби дусличи-дус нуша илини сагати произведениебачил разидирнира. ГIергъиси замана илини декIар-декIарти темаби ахъдуцибти дахъал произведениеби делкIун. Гьанбикесли саби, И.Б.Ибрагьимов дуги-хIери хIеили, бамсри хIебалули узули сай или. Илкьяйда бетра бетарули саби. ЦархIилван, гIергъити чумал дусла духIнар адамли илдицад произведениеби делкIес хIейри. Илала творчество литературала декIар-декIарти жанрабачил давлачебли саби. Писательли хабарла дурарад романти, повестуни, новеллаби лукIули сай. Буралли, даргала писательти-ургав ишхIели романна жанр бу­за­хъуси И.Иб­ра­гьимов сай левси.
ХIера, бара гьалабванра Ибрагьим Ибрагьимовла ­«Бугь­тан» (2026 д.) бикIуси жуз дурабухъун. Гьанбушиливан, жанр хIя­­сибли, ил роман саби. Романна дурарад жузлизи кадур­хули сари повесть, хабурти ва новеллаби.
Иш гьакIлизир писательли нуша тамашадирулра дар­ган­та­с­ сагаси тема ахъбуцниличил. Романна улира илала бухI­на­буцличила бурули саби. Жузла гьалагъайлизиб писа­тель­ли ислам динна тарихлизибадси МяхIяммад Идбагла (с.гI.в.с.) ва илала хьунул ГIяйшала гIямрулизиб бетаурси анцI­букь­­­ли­­чи­ла хIядислизибадси хабар гьанбуршули сай. Или­чиб­­ли пи­са­тельлис учIаннизи аргъахъес дигули сай, дебали хIя­­лал­си, вархьси адамличира бугьтан чебихьес гIелум­хIе­бил­зути адам­ти биэс бирниличила. Амма илди гъай-мез, цар­хIил­ли­чи че­бирхьуси бугьтан мурталра-декIар дархьтили ур­дул­хъу­­ли хIедирар. Дахъалгъунти анцIбукьуназир илди дугI­ла­ти­­ли ва сабаб агартили детарули дирар. Адамличи бугь­тан че­­бихьес дебали гьамадли саби, амма ил тас­дикьбарес ба­гьан­­­дан бикьруми хIяжатти саби, илди хIе­­биалли, мезлукьли гIягI­­­ниагарти мез тIинтIдирниличил ха­ла­си бунагь чекайсули сай…
Романнизир анцIбукьуни 19 ибил даршдуслизир кадиркули сари. Авторлис игитунала гIямру итхIелла манзил­лизир сари лертиван сипатдарес имканбакIиб. Романна бекI игит Ирбагьин урехиагарси, бархьдеш дигуси, цIуръа дурхIя сай. Ил дахъал къияндешуначил, бархьагардешуначил вяхIигули сай. Игитуни чула хъархIерагардеш ва гIямрулизиб саби-бегIси мер баргес багьандан бургъули саби. Къаршити игитунани чус дигуси бетерхахъес уряхIти баркьудлуми дурадуркIес гIелумбилзули ахIен. Илдала инсап-хIяя агара, илхIелира чули хIедузахъути шаригIятла кьанунти пайдаладарили, уряхIти кьасани детурхахъули саби.
Ирбагьиннис дигуси рурси сунес хIейгуси давлачев ур­ши­лис шери редниличил таманбирули ахIен анцIбукь. Или­чибра тIашхIебизурли, вайнукьабани рурсиличи бугьтан че­бихьес кьасбирули саби ва бусурмантала гIядат хIясибли, тан­­бихI­ларирули сари. Илала шайчиб дурасибси танбихI — шан­тази къаркъубау ралцIахъни сабри… Ишаб ахIерти дучIан­ти, анцIбукьуни селичи детиркулил хIушази багьахъес бал­те­хIе. Романна сюжетла бетуц адам тамашавирахъути, кьакьаикIахъути анцIбукьуначил бухIнабицIибси саби. Цалра учIан романнизир кадиркутани авараагарли хIелта.
Даргала литературализиб сагаси тема ахъбуцниличил И.Ибрагьимовли литературала произведениебала хазна че­би­цIахъес ил давлачеббарес имканбакIиб.
Бурес чебиркур, Ибрагьим Ибрагьимовла литературала произведениеби сагакьянчидешличил, сунес гьалар чилилра гьарг­хIедарибти, урхIмешуахIенти темаби ахъдуцниличил декIар­дулхъули сари. Челябкьлализир писательлис сунела пай­даласи бузерилизир, литературала сагназир гьатIира да­хъал сабухъуни дучахъес сархибдешуни дулгулра. Даргала ли­тературала чилилра хIедяркъурти, гьаргдарес имкан­хIе­­бакIибти пагьмула майдунти арилизи дуцахъес писа­тельла рухIлашалти цIакьани, кьаркьайзиб арадеш имцIа­ди­кIаб. ХIушагъунти писательти лебай, даргала лите­ратура дав­лачеббирниличи ва гьалабяхI башниличи ташмишдеш алкIули ахIен.