ДР-ла лебдешла Министерстволизиб Дагъиста вице-премьер Заур Эминовла миллатла культурала «МухIела майдан» бикIуси сагаси комплекслис бекIдеш дируси Муслимат МяхIяммадовачил гьунибаъни бетерхур.
Ведомствола пресс-службализиб багьахъурливан, Заур Эминовли белгиси проект Дагъиста культурала букьур мяхIкамбарес багьандан дебали мягIничебси биъни, ва илдигъунти сиптаби челябкьлализирра гIердуцес хIядурли виъни аргъахъиб.
Бурес чебиркур, гьаларван проектла автор Муслимат МяхIяммадова ДР-ла лебдешла Министерстволизи дугьаризурсири миллатла майдан акIахъес икьалабарес ибси тиладиличил. Министерстволи насихIятуни дедлугнила шайчиб хIяжатси кумек гIеббаахъибсири.
Гьунибаънила дазурбазиб, «МухIела майдай» пайдалабируси ванзала участок шила хозяйствола даражаличибад хаслира хIеруди бузахъуси ванзаличи шурбалтнила хIекьлизибси хIукму къулбасбариб. Илгъуна хIукмули тамашаласи объект мяхIкамли калахъес ва гьаннала гIергъира гьалабяхI арбукахъес имканбикIахъу.
