Диви ГIяхIмадовна Рабаданова акIубси сари 1957 ибил дусла сентябрьла кIиличир Дахадаевла районна Кьункьила шилизир.
ГIямрули гьарил адам сунес дигутани виркьахъес валтуси ахIен. Амма цIакьти ва гIяхIти адамти къияндешунани гьатIира чIумабарили, дебшлабирути саби. Хъалибарглизир халалгъуна рурсили бегIтас верхIел узи-рузи халабаахъес, бяркъяхъес кумекбариб, сенкIун дудеш Кьункьила шила школализив шоферли, неш колхозлизир бузути сабхIели.
1976 ибил дуслизир Диви ГIяхIмадовнани ГIяштила шила урга даражала школализир вецIал класс хъараахъурсири, гIур 1979 ибил дуслизиб Хасавюрт шагьарлизиб шила хозяйстволис хасбарибси техникум белчIунсири. Илаб илини бухгалтерла санигIят касиб, илхIелира шула кьиматуначил ручIули. Бузерила цаибти гунзри Дивини сунела шилизир дехIдирхьули сари. Гьаланачи Дахадаевский бикIуси совхозлизир складла заведущаяли, кIинайс бухгалтерли рузули сари. ХIянчиличил барх илини жамигIятла гIямрулизирра жигарла бутIакьяндеш дирулри.
1976 ибил дуслизир илини Кьункьинский бикIуси совхозла партияла организациялизир секретарьла хIянчи дузахъи. Чуйнара ил хIеруди бируси организацияла кьукьялизи риркIусири, райкомла КПСС-ла бутIакьянчи ретаурсири. Диви Дахадаевла районна Советла депутатлира рикIибсири. Жигарчерси, разиси, цархIиллис гIяхIдеш барес дигуси, чинар рузалра ил гьаркьяна сарливан декIаррулхъусири.
1998-2010-ибти дусмазир Д.ГI.Рабаданова Кьункьила администрациялизир секретарьли рузули калун. Гьанна биалли, ил шила администрацияла бекIла заместительли рузули сари.
Диви Рабаданова бузерила ветеран сари. ИшбархIира илини шилизир ва районнизир дурадуркIути далдуцуназир жигарчерти бутIакьяндеш дирули сари. Ил райкомла партияла ХIурматла Грамоталичи, Баркаллала кагъуртачи ва цархIилти шабагъатуначи лайикьрикибси сари.
Илис дебали дигахъу музыка, тIабигIят, назмурти лукIес, къиянси агилизи бикибти адамтас кумекра биру.
Гьамадли ахIенси кьисматла регI Диви Рабаданова духуси, гIякьлучерси, жагаси хьунул адам, урехиагарси ва цархIилтачила пикририкIуси даргала халкьла — Буркьула рурси сари.
Мурад Алжанбеков
