Июль ва августла бузрала бехIбихьудличиб Хайдакьла районнизибадти кIел гIуллухъа спортсменни халкьани-ургабси майдайчир спортла чедибдешуни диахъуб.
ЖирабачIила шилизивадси Ислам Рабадановли августла 1-3-ибти бурхIназир Афинализир детурхути U-17 азадли мушулбашнила шайчирти абзаначиб жарма сархиб. 48 килограммличи бикайчи битIакI хIясибли, илини хIябъибил мер буциб.

И.Рабаданов гехIел дус Мажалислизив спортлизи ахъибсири, бегIла гIергъиси дус биалли, МуртузагIяли ГIямаровла бекIдешлиув МяхIячкъалализив хIядурвикIусири. Россияла гьалабдеш багьанданти абзаназиб чедибдеш, гIур халкьани-ургарти абзаназиб жарма – ил дебали къиянси ва бухъянси бузерила хIясил саби. Ислам ункъли учIра учIули, спортла абзаначи чекайзурли хIядурвикIули сай. Илини сунела хьулличила – Олимпиадала мургьи сархес дигниличила уркIи гьаргли балахъули саби.
Илис гьалаб, июльла 5-6-ибти бухIназиб Донничибси Ростовлизиб бетерхурси TWW BJJ грэпплингла шайчибси Европала гьаргси чемпионатличир Киркила шилизивадси Ислам МяхIмудовли гIяхIти хIясилти чедаахъиб. Ил абзикIусири 54 килограммличи бикайчи битIакIлизив 12-13 дусла гIямрула спортсменти-ургав.
УрчIемал дус виубхIейчивад спорт илала гIямрула бутIали бетаурли саби. ХIябал дусла духIнар илини спортлизир гIяхIцад тренировкаби ахъиб. Урши гьалавяхI вашахъес гьуцIирули сай илала дудешлира – гьалав боксёрли, спортла мастерлизи кандидатли вируси.

Хайдакьла районна администрацияла пресс-служба