Ишдусла февральла 7-8-ибти бурхIназир Кабардино-Балкарияла Республикала Баксан шагьарлизир спортла пауэр­лиф­тинг (цIакь хIясибти хIябдехI абзани) жу­рала шайчирти лебил Россияла абзани де­терхур.
Илдани Россияла регионтазибад бегIлара цIакьтигъунти спортсменти цалабяхъиб ва хIербикIутас жагати абзани гьаладихьиб, сарира спортла гIямрулизир дебали дигестили детаурти.
Абзаназир чихъти устадеш чедаахъиб Лавашала районна спортсменти Ислам МутIалимовли ва ГIумар Камиловли. Ибкьси абзлизиб Ислам МутIалимовли 110 килограммла битIакIлизиб чедибдеш сархиб. Абзанала баянти хIясибли, илис пауэрлифтингла шайчивси спортла мастерла хIурматла у бедиб. И.Му­тIа­лимовли илкьяйдали арагIебси битIакIла журализирра бутIакьяндеш дарили, кIиибил мер буциб. ГIумар Камиловли 100 килограммла битIакIлизиб арцла медаль сархиб ва пауэрлифтингла шайчивси спортла мастерла кьяйдурти (норматив) детерхахъур.
Нушала спортсментани гIяхIти хIясилти чедаахъиб. Нушани илди уркIи-уркIилабад мубаракбирулра: Ислам МутIалимов — лайикьси шабагъатличил ва чедибдешличил, ГIумар Камилов – дигести сархибдешуни диахъниличил. Дигулра хIушани спортла гIямрулизир гьатIиралра халати чедибдешуни диахъубли, чеббикIибси бетуцлизир гьала­дяхIцун дашули.