Иш дунъяличиб адамла арадешлизи бухъеси селра агара. Арадеш нукьсан­бикили гIергъи дебали къиянни саби ил къулайбарес, вегI­личи балбикеси дарман баргес ва сунела санигIят ункъли балуси тухтур варгес.
Гьарли-марли ишбархIи заманаличиб изалара кабизахъурли, илис бархьси лечениера баралли, ил зягIипсила халаси игъбар саби. Камли ахIен илдигъунти тухтурти урусуни бикIуливан «Врач от бога», санигIятлашалти чихъти устадеш лерси ва бусягIят изалара белгибарили, зягIипсила арадеш къулайбиахъес бажардибиркути тухтур­ти. Илдигъунтазивад сай Хаса­вюрт­ла шагьарла больницала урологияла отделениела заведующий Шапиев Марат ГIусманпашаевич. Ил пергер тухтурличила бахълизибад аргъибсири, амма иличил ну 2023 ибил дуслизив Пятигорск шагьарлизив сана­торийлизиб бамсриихъухIели тя­ни­шиубсири. Столоваялизир нуша ца стол-алав къаршидикира. Марат ГIус­манпашаевичли сунела гIямрула рарх­кья ПатIиматличил барх бамс­ри­ихъулри. Чумал бархIила духIнар ну­шала юлдашдеш демжур. Сунечила баянти хьардаибхIели, илала бегIти Ла­вашала районна машгьурси Къуппала шилизибад биъни багьурра. Сунечила сегъуналра гапла гъай хIейгуси Маратли санигIятличила селра-декIар хIебуриб.
Ца бархIи процедура барес яргаличи кайзурхIели, Хасавюртла районна Аксайла шилизивад бамсриахъес вакIибси МяхIяммад набчи гъамиубли, Марат ГIусманпашаевичличила дебали гIяхIти гъай дуриб. Илини бурни хIясибли, санигIят ункъли балуси тухтур гьарил зягIипсиличил малхIямли гъайикIар ва итмаданал изала белгибарили, лечение бехIбирхьу. Бахъал гьести гIямрула адамти, гапбикIули ва разили арбашар Марат Шапиевличибад. Урцецунала, жихIла пушягIла, простатитла изала хIебикибси, мажахIят, левли виэс мурул адамтала ургав. ИмцIатигъунтира Маратличи чула челукьусиличила бурес урузкIули башар. Сунела жагьти гIямруличи хIерхIеили, Марат ГIусманпашаевичла чихъти багьудлумира устадешра дакIударили, лечениера барили, зягIипти разили хъули бурхьу.
Наб ишар Марат Шапиевла гIям­ру­личила кам-гьамти баянтира дурес дигулра. Ил акIубси сай 1982 ибил дуслизив Хасавюртла шагьарлизив, мугIяллимтала хъа­либарглизив. Илала бегIти дудеш ГIус­манпаша ХIябибович ва неш Ханипат Багьауттиновна дахъал дусмазиб му­гIяллимтили бузули саби, чеалкIуси нас­лу багьудлумачил бегIбирули, ва гIяхI­си бяркъличи бикахъес халаси пай кабирхьули саби. 1999 ибил дуслизиб Маратли Хасавюртла 10-ибил школа мургьила медальличил белчIи, Дагъиста пачалихъла медицинала академиялизи кархули сай. 2004-ибил дуслизиб илини чедиб бурибси Академия хIунтIена дип­ломличил таманбариб. 2004-2005-ибти дусмазиб илини Хасавюртла больни­цала цахIнабси хирургияла отделе­ниелизиб интернатурара таманаиб. 2005-ибил дусличибад сунела бузерила гьуни Хасавюрт шагьарла больницализиб урологли узули бехIбихьиб. Ил узулри машгьурси хирург Ханакаев Давут Ханакаевичла бекIдешлиув. Халаси кумек бариб Давут Ханакаевичли илис. Мурталра насихIятчи илис гIибратли вирар. Дебали пагьмучевси тухтур Марат ГIусман­пашаевичличи больницала руководстволи урологияла отделениелис бекIдеш дарахъес хъарбариб. 2013 ибил дус­личивад ил баягъи от­делениела заведую­щий сай.
Мурталра зягIип­тачил варх, бегIлара къиянти операциябачив вирар Марат Шапиев. Адам ми­цIирли левал­цадхIи учIес ва багьудлуми че­дир­цIахъес гIягIниси саби. Ил ба­гьандан Маратра мурталра сагати технологиябагIив умцIули, илди бузерилизир пайдаладирули вирар. Ил Москвализир, Санкт-Петербурглизир, Со­чилизир, Казаньнизир дурадеркIибти гIилмула декIар-декIарти конференциябачи вякьун. Заманаличил варх вашес багьандан сагати технологияби пайдаладирес гIягIнили сари. Медицина гьар бархIи гьалабяхI башули саби, компьютерла ва роботунала кумекличил дебали къиянти операцияби дурадеркIес имканбикIули саби. Медицинала дигIяндешуни дяркъес багьандан, Марат Шапиевли декIар-декIарти макьалаби дучIули вирар. Ишар дахъал дурес вирар Марат ГIусманпашаевичла сархибдешуначила ва мурталра баркаллаличил дугьабилзути илини арабарибтачила.
Марат урибси тухтурцун ахIенну, пергер хъалибаргла бекIра сай. Сунела гIямрула рархкья ПатIиматличил хIябал дурхIя абилкьули сай. Бурес чебиркур, ПатIиматра тухтур сари, мурталра арадешлис къарауйчирси.
Вирхулра, М.Шапиев сунела гьамадли ахIенси бузерилизив гьатIира гьалавяхI аркьниличи. ЧIумаси арадеш ва духъянти гIямру дулгулра хIед, хIурматла Марат ГIусманпашаевич!