Ахъушала шилизибси дурхI­нала анхълис дахъал дус­мазир бекI­деш дируси ГIя­ма­рова Рай­хIянат Исраповнани халкьла ва сунела хIян­чи­зартала, дурхIнала бегI­тала ургаб халаси хIурмат сар­хили сари. РайхIянат мал­­хIям­си, черетаибси, жавабкар­деш­личил рузуси адам сари.
РайхIянат ГIямарова акIубси сари Ахъушала шилизир, хIурматла хъалибарглизир. Илини Дагъиста пачалихъла университетла филологияла факультет таманбариб. Школа-интернатлизир воспитательли рузули калун. РайхIянатли Ахъушала шилизибси дурхIнала анхълизибра халаси бузери барили сари, 28 дус илар рузули. Рай­хIя­натла 49 дусцад бузерила стаж лебси саби.
Илини «РФ-ла багьудилашалси хIур­мат­ла хIянчизар» ибси у касиб, «Ахъушала район» МО-ла администрацияла, багьудила управлениела шайзирад чумал ХIурматла Грамоталичил, Баркаллала кагъуртачил шабагъатларарибси сари.
РайхIянатли сунела гIямрула вархкья ГIямарличил авал урши-рурси абикьур, илдас гIяхIси бяркъра бедиб, багьудира касахъили, гIямрула дякьличи дураиб. Гьанна илдачибад акIубти абикьахъес кумекбирули сари.
РайхIянат Исраповна дебали гап­ри­кIули сари сунела хIянчизартачила. Ил­ди-ургар балгундеш, гьалмагъдеш, диги диахъес багьандан илини халаси къайгъи би­рули сари, илди цархIилти адамтани гапбараллира ил дебали разирирули сари. ЦархIилтас гIибратли ретаурли сари Рай­хIя­нат учреждениела руководитель сарливанра.
РайхIянатли бурули сари лебилра дурхI­нала анхълизибти воспитательтани чебяхIси даражала багьуди касибти саби или.
«Гьарил хIянчизарли чу­чи хъарси хIянчи чебетаахъили, жавабкардешличил биру, дурхI­начи дигичебли, уркIецIи­чеб­ли вяшбикIар, илдази багьуди касахъес, бяркъ бедес, суратуни дирахъес жура-журала хIязаначи бурсибарес къайгъилизиб бузули, чула хIянчи даимбирули саби.
— Нушала хIянчизартани «Дусла воспитатель» бикIуси конкурслизир бутIакьяндеш дирули бирар, чуйнара «Ахъушала район» МО-ла администрацияла шайзирад ХIурматла Грамотабачил шабагъатлабарибти саби.
Ишдусра халкьани-ургабси хьунул адамтала байрамла БархIила хIурматлис ва дахъал дусмазиб хIялалси хIянчи барнилис нушала чумал хIянчизар шабагъатлабариб. Илди саби Байгинат БяхIяндова, ПатIимат Зияутдинова, рахъхIи медсестрали рузуси Калимат Ибранова, къарауллара кладовщиклара хIянчи дируси Умамат Кьурбанова.
Челябкьлализибра нушани къайгъиби­рехIе гIяхIил дузес, дурхIнас гIяхIси бяркъ бедес, дурхIнала анхъ гIяхIси тяхIяр-кьяйдаличиб биахъес», — бурули сари РайхIянатли.
ГIямрулизир ва бузерилизир сархибдешуни имцIа­ди­кIаб, хIела дигутани разирирули хIерриэс кьадарбиаб!

С.ГIябдуллаева