Ну школализи ва­шу­си замана дила му­гIяллимли ви­ру­си­ри Багьавдин МяхIям­ма­до­вич Арсланбеков. Ил та­рих­чи сайри, суненира ну­ша­ла ши­­ли­чила, респу­б­ликала та­рих­­личила да­хъал гIилмула хIян­­чи дарибси ва жузи ду­ра­каиб­си. Илкьяйдали Дагъиста ис­то­рия­ла дарс кабирхьули узу­сири илала ха­ласи узи, машгьурси спортсмен, исто­рияла гIил­муртала кандидат, про­фес­сор ХIяс­булла МяхIям­ма­дович Арс­лан­беков. Илдани дирути дурсри бу­чIан­тас дебали дигахъи. Тамашала ха­­бурти дурули дири ил­дани дурсрачир, хаслира Да­гъиста ванза, дарганти маш­гьур­барибти адамтачила. ГIям­­рулизир хIяжатти наси­хIятуни, гIя­датуни, куль­тура, адамла кабизличила гъай камхIедири. ХIера, илдани чуйнара дурс­рачив гьану­шибсири маш­гьурси спортсмен, дебали цIакьси, ду­рала пача­лихъу­на­зибра су­не­чила ха­бар­дер­хурси Шара­пут­дин ГIяб­­­­дул­­­­хIялимович ГIяб­­дул­­­­­хIя­ли­­мов­ли­чила. Ил Советс­кий Союзла улкала цирк­ли­­зив узусири ва иличил варх ду­­­­­рала пачалихъунази булан ваиб­­­­сири. Илар хIянчи таман­да­­­рили гIергъи, ил Из­бер­баш ша­гьарлизи гечирули сай ва азадли мушулбашнила шай­чиб­си секция ал­кIахъули сай. ХIя­жат­­ти имканти кали диалра, гьа­лар лерти къиян­де­­шуначи хIер­хIеи­ли, илини бахъал маш­гьурти спортс­менти абикьур. Ил­кьяй­да­ли хIядурбариб чузиб цIакь леб­ти спорт­сменти. Илдани илала гьу­ни даимбариб.
Шарапутдин ГIябдулхIя­ли­­­мов гьаниркахъули, нушала рес­­­­публикализир декIар-де­кIар­­ти абзани дурадуркIули ди­­­рар. Илис хасбарибси абз им­­­­цIа­ливан Избербаш шагьарли­зиб дурабуркIули бирар. Чуй­на­ра дураберкIибсири Лаваша­ла ши­­лизиб. Гьанна биалли чу­­­ла шан гьаниркахъули, абз ду­­­ра­­беркIиб МикIхIила ши­ли­зиб­­ра. Сентябрьла 26-27-ибти бурхI­­назиб шила спортла КIял­гIя­­­лизиб азадли мушулбашнила шай­чибси XVIII ибил абз бетерхур. 2008-ибил дуслизиб яра чедиб акIубти спортсмента­ни бутIакьяндеш дарибтири. Абз жявлил халкьани-ургабси бе­таур­ли саби. Илис бикьридеш ди­­рули саби Узбекистайзибад ба­кIибси командалира. РФ-ла мер-мусаличибад ва дурала пачалихъуназибад бакIили 215 мушлукья лебри.
МикIхIила шилизиб ил да­ра­жала абз дураберкIни де­ба­ли мягIничебси анцIбукь са­би. Сен­кIун ши сунела спортс­мен­тачиблира дебали маш­гьурси саби. Гьанна шилизир спорт дигантас хIяжатти лерил­ра шуртIри акIахъубли сари. Спорт диганти, илизир сархибдешуни диахъес гьуцI ва кьас лебти дурхIни са­би. Гьа­лаб шилизиб бахъал адамти хIербирутири. Гьанна микI­хIен­ти Россияла лерилра мер-мусаличиб баргес вирар. Леб бахъал дурала пачалихъуназиб хIербирутира. ИшхIелла манзиллизиб адамти чула яшавбарес гьамадси мерлигIиб умцIули саби. ХIябал азир адам саби шилизиб лебти. Дурабти хIисаббаралли, гIяхIцад леб. Чинаб хIербирули биалра чула гIядатуначила хъумуртули ахIен микIхIентани, илкьяйдали илдани чула аслу-миналичила ва машгьурти шантачилара хъумуртули ахIен. ИшбархIира шилизиб бахъал чемпионти леб. Чисалра дигIяндеш ахIен, ишбархIи дурхIнас дебали дигахъусили бетаурли саби телефон. Бахълис илаб саби спорт.
Абзличи гIяхIладли гIяхIцад адамти бакIиб. Илди-ургаб лебри бахъал спортсментира. Лавашала районна администрацияла бекIла за­меститель ГIябдусалам Ди­­бировли Шарапутдин ГIяб­­дул­­­хIялимовличила, илала гIям­рула гьунчила цахI­на­би­кибтази гьанбушиб, абзличи бакIибти гIяхIлас ва спортсментас баркалла багьахъур. Лавашала районна администрацияла бекI Мухтар ХалалмяхIяммадовла шайзирад чумал адамлис савгъатуни дедиб. МикIхIила шила администрацияла бекI Руслан ХIяжиевлира абзличила ва шилизи бакIибти гIяхIлачила цахIнабикибтази буриб. Гьаннала гIергъира ил журала абзани ва цархIилти далдуцуни дурадеркIили дирар спортла кьадри ахъбуцес или аргъахъиб.
КIел бархIи дебали тамашала ва къугъати гьунибаъниби детерхур. Лебтасалра дигули бирар чедибдеш сархес. Амма чи-биалра чедииркуси сай. Удивикибсилис гъира саби гIурилти абзаназиб чедибдеш сархес багьандан сунела устадеш имцIадарес. Илгъуна журала абз илис имкан саби. Чедибикибтас медальти, кубокуни ва арцла премияби дедибтири. Лерри савгъатуни районна, шила администрациябала шайзирад. Ну вирхулра, ил абз челябкьлализибра даимбирниличи ва мурталра ил сай акIубси шилизиб дурабуркIниличи.