Ванати ва шалати хъулрази нуша кадиахъес, дурхIни бучIахъес, халкь даршули хIербиахъес багьандан, ишхIели леб чумал дус дугурбазиб хIебусути, янила чиллализиб биргIути, дуцIрумлизиб дегъдешли игути, зигаръала агарли, ВатIан багьандан Украинализиб дурабуркIуси дявила хасси балбуцлизир жигарла бутIакьяндеш дирути игитуни.
Дигахъаси наб гьарил илавси гъабзас багъишлабарили се-биалра белкIес, белчIес ва дунъяличи иличила хабардерхахъес, амма гьачамлис ил дила пикри тамай бетерхахъес къиянни саби. Сен-биалра нуни валуси ахъалли, иличила белкIес, цархIилтазира илала гьунартачила бурес, цагьатIи игитличила хабар нушала газета бучIантас гьалабихьес уркIи гьалакли бирар.
ИшбархIи биалли, наб бурес дигуси игит Къаякентла районна Дружбала шилизивадси Халитов ХIясбуллагь Минатуллаевич сай. 2022 ибил дусла октябрьла 19-личив ил Москвала областьла Балашиха шагьарлизивад (ил манзил илав узулри) Россияла Ярагъладарибти ЦIакьанала къяяназиб къуллукъбарахъес арукибсири.
ВатIа гьалабси сунела чебла илини гьарли-марси гъабзали кьяйдали ахъиб. Чуйнара дергъла майдайчир ва гьалмагъунала гьалар адамдеш чедаахъиб, иличибли, гьайгьайрагу, хIурматра сархиб. Дявила къуллукъуни асилдешличил тамандирули, душмайс цIакь ва чIумадеш чедаахъесра бажардиикиб игит.
Россияла Федерацияла Президентла ХIукму хIясибли, 2024 ибил дусла апрельла 22-личив ХIясбуллагь Суворовла медальличил шабагъатлаварибсири. Ил дусла ноябрьличивад ил дергъла масъулти ирзули, къел-хIерзи агарли ветахъибсилизи халирули сай. Сецад хIейгеси биалра, иличила ишбархIи балуси селра агара.
Илала у нушани умутличил гьанбуршулра, дирхулра ил хъули ара-сагъли чарулхъниличи.
ПатIимат ГIяхIмадова
