Къаякентла районна Первомайскла шилизирадси Хадижат Кьурбанова бахъли ралуси хьунул адам сари. Илини сунечи хъарси чебетаахъили бирули, яхI-сабурличил рузули, район ва республика гьаладяхI дашахънилизи белгиси пай кабирхьули сари.
Хадижат Кьурбанова акIубси сари 1951 ибил дуслизир Сергокъалала районна УбяхI МулебкIила шилизир, халаси хъалибарглизир. Илини шилизир 9 класс тамандарили, 1970 ибил дуслизир Дербентла шила хозяйствола техникумлизи карерхур. Техникум ункъли хъараахъурли, 1978 ибил дуслизир тракторличир рузес рехIрихьиб. Первомайскла къатIла больница бирухIели, гIур «Каспий» совхозла минзавод бирухIели, Хадижатли тракторличиб кумекбарибсири.
10 дус тракторличиб хIянчи барили, «Каспий» совхозлизир тIутIила бригадирли рузес рехIрихьиб. Ил бусягIятла заманара тIутIи луцIутала хIябъибил бригадала бригадирли рузули сари. УрчIемал бригадализирадли Хадижатли мурталра цаибил мер бурцули ва гIяхIти хIясилти чедиахъули, совхозлизиб 45 дус хIянчи барили сари. Илини сунела хIянчира тамандарили, цархIилти бригадабас буланра кумек гIеббиахъу.
Дусмадли касибти устадешли Х.Кьурбановас тIутIила гIяхIси сабухъ бурчахъес ва хозяйство бузахъес имканбикIахъули саби. Илала бекIдешлиубси бригада, къияндешуначи хIерхIеили, чула хIянчи ункъли гьунчидуршесра, цархIилтас кумекбиресра бажардибиркули саби, иличибли совхоз гьалабяхI башахъули. Гьаннала гIергъира сархибдешуни дирахъес Хадижатлис чIумаси арадеш булгехIе. Хадижат Кьурбановала бригадализир рузуси Паризат Булкъадаровани илис иш назмура багъишлабирули сари:
Шила дублаб белшунси ца хъали бурулири
Илар хIу хIеррирулри нушала Хадижат рузи,
Авал узила рузи хIулкIули хIерриубси,
ХIела авал рузини жагали хIеррарибси.
МугIяллимтас ахIерси, сарри ункъли ручIуси
Лебилра бучIантас хIу гIибратлира рируси,
Дулай някъби кьуватси, бекI някъби сахаватси
Къиян бакIиб мерличи бегIла гьалар риуси.
Дубурла вавнигъунти хIябал рурси баркьибси
ВацIала сартангъуна чIумал урши айкьурси,
Сарри кьалли Хадижат жагал исбагьигъуна
Лебилра хIянчизартас гьалжанала анхъгъуна.
ПатIимат Мирзаева
