Дубуртар Улкализиб кьуватчебти ва пагьмучебти адамти мурталра бирутири ва гьаннала манзиллизибра сецад-дигара леб. Республикала миллатуни-ургаб даргантира илгъуна бетуцлизиб гьалабтала къяяназиб саби. ГIилмулизир, спортлизир ва цархIилти бетуцуназир жагьилтани чула пагьмурти чедиахъули сари ва дунъяличиб машгьурбирули саби. Илдигъунти бахъла уми дурес вирар, амма иш белкIлизиб ца багьадурлацун у гьанбуршис. Ил Дахадаевла районна Шурклила шилизивадси Кьурбан ЛигIматов сай, суненира спортлизир гIяхIти сархибдешуни дирахъули, умутличил гьалавяхI вашуси. Илини чеббикIибси хоккей саби. БусягIятла манзиллизив миллатла хоккейла лигализивси Дагъистайзивадли цаибси хоккеист сай ил.
18 дус виубси Кьурба бегIти Москвализиб хIербирути саби ва спортсменра илав акIубси сай. Авал дус виубхIейчивадли ил ЦСКА-лизив хоккейли виркьескайибсири.
2025 ибил дусла мартличивад ил КХЛ-ллизив сай. Июльла цаличиб биалли НХЛ-лизиб цаибси матч дураберкIибсири. Жагьси защитникла ихтиюрти касиб илини Америкала «Каролина Харри-кейнз» бикIуси клублизир. Илгъуна баркьуди Кь.ЛигIматовла пагьмулис кьимат бедницунра ахIи, лебилра Дагъистайс тарихлашал мягIничебси анцIбукьлира бетаур. БусягIятла манзиллизив командаличил варх абзаначи хIядурикIули, Кьурбан США-лизив сай.
Москвала «Динамолизив» бухъянси манзиллизив В.Подъяпольский цайли цаси адамри фамилиялизиб «ъ»хIярп лебси. Гьанна илди кIел леб, илди ца командализибти саби. Урус мезли Кьурба фамилия Лиъматов или лукIули саби.
Мартла цаличив «Куньлунничил» бегI гьалав КХЛ-ллизив (6:3) Кьурбан ЛигIматов дуравхъунсири. 17 дус виубси защитник миъличив кIел сменализив узиб ва гIяхIти устадеш чедаахъиб.
«Ну Москвализив акIубсира ва гьар дус дуцIрумлизив Дахадаевла районна Шурклила шилизибти дила хала дудешличи ва хала нешличи вашусира, — бурули сай хоккеистли. — Иличиб гIяхIси мер хIебирар бамсриахъес ва цIакьани дучес».
Ил МХЛ-лизив А.Кудашовличил — «Динамо» клубла бекI тренерла уршиличил варх узусири. Дубурлан багьадурла устадешличи ва пагьмуртачи барх бузанти ва тренерти пахрули хIебиркьесра хIебирар. Гьайгьайрагу, Дубуртар Улкара Дахадаевла районра иличи пахрули биркьес ихтияр леб. Кьурбан устадешчевси хоккеист сайливан «Динамоли» иличил хIябал дуслис вягIда бигьи саби.
«Кьурбан ЛигIматов клубли халаси игьдибар бихьибси спортсмен сай – вягIда билгьниличи хIулукIибси гьалав москвалантала спортла шайчивси директорли узули калунси Алексей Сопинни балахъули сай. – Нуша дебали разилира «Динамо»-лизи илдигъунти спортсменти цалабиркниличи».
2024 ибил дусла Росстатла баянти хIясибли, Россиялизиб 670 азир дарган хIербирули саби. Илди бузери дигути, сабур-яхIли жагабарибти ва гъабзадешчебти адамтани нушала ахIерси ВатIан вавалибяхъяхъес ва улкала хъархIерагардеш батахъес багьандан дахъал къайгъни дакIудирули сари. Гьаннала гIергъира Кьурбангъунти багьадуртира имцIабикIули, даршуси закла удиб чула цаулкалантачил хIулкIули хIербиабну саби.
ПатIимат Кьурбанова
