Дусми, бузри, бурхIни, сягIятуни хIя­билра хъярхъли ардашули лер. Илис дургар гIямрура ишцад му­ри­ти.
Амма, сецад дусми шалгIердухъалра, гIям­рулизиб къаршибиркути гIяхIти ва вай­ти адамти, илдала баркьудлуми гьаман гьандиркули дирар. Деза биаб Кьудратла ВегI­лис, гIяхIдеш барес гIелумхIебилзути, иман-инсапчебти бахъал инсанти набчил леб­нилис. Дила аргъайзир мурталра ванати гьан­бикуначилцун ухуси, чинар цугрикалра, ур­кIи разибирахъуси УбяхI МулебкIила урга даражала школала мугIяллим МяхIям­мад­хIя­жиева Разият ГIусмановначила бурес дигулра.
Ванати бурхIначи разидикили, бикIу­ливан, бара демжурли далкьаурхIейс, дуцI­румли тя­мададеш гIебшниличи хъардариб. Шакалра хIе­дикили дуцIрумла каникултира шал­гIердухъун. Школализи рурси хIядур­ри­рули рархибхIели, ну школализир ручIуси замана гьанбикиб. ВегIебш, ишди аркьути дусмала гьалакдеш! Гьанбиркур, 8-ибил класс ца школализиб таманбарили, 9-ибил класслизир ручIес цархIил школализи рукьес чебуркъубли. Ит­хIели набзирти урехила, урезила ва алав­тачи бирхауди агнила хIяланала дахъ­деш­ла ахир аги. Амма, итхIели ил классла руко­во­дительница Разият ГIусмановна риъни нуни мурталра халаси игъбарлизи халбирули рирус. Ит замана жагьси учительница риалра, ил нушаб — сунела класслис — гьарли-марси юл­дашли, насихIятчили ва халал рузили ре­таур. Нушани гъайличил хIебурахIелра, бу­чIан­тала уркIби се дикIулил ил пагьмучерси му­гIяллимли иргъули рири. Наб гьалар чедаэсра хIейгути дурсрачи, хаслира — къиянни иргъути урусла мезличи, руководительницани диги имцIадариб. Сари филолог риалра, Ра­зият ГIусмановнани лерил предметуназирти суалтас нушани аргъесли жавабти луги. Наб ил гьан­нара тамашабилзан.
Мурталра разити, шалати дяхIличил дурсрачи раши, ил хумархIериахъес, нуша­ла классличила цархIилти мугIяллимти зигар­хIе­бикIахъес, лебил класс, бекIлил белчIуди хIейгутира бархли, биубси тяхIярли дурсрачи хIядурбикIули бири. ГIяхIси мугIяллимла дарс дурхIнас имцIали дигахъу бикIули бирар. Разият ГIусмановнани биалли, дурхIни шко­лаличира бархли дигичеббиахъуб. Клас­сла рурсби къаршидикахIелли, телефон­ни­зирад гъай­дикIахIелли, итди нушаб дурхъатили детаурти школала дусми бусягIят гьан­дир­ка­хъехIе. Гьанна нушара бегIти детаурхIели, бучIантачи дигичерси, нушачил рахъ малхIямси ва дебали гIякьлучерси Разият ГIус­мановнала гIяхIсант гьатIира гIяхIли балулра. Баркалла биаб илис, дурхIначи дигичерси мугIяллимлис.
БелчIудила сагаси дусла бехIбихьудличил Ра­зият ГIусмановнара лебил мугIяллимтира му­баракбирулра! Къиянси санигIят диги­ли­чил бузахъути мугIяллимтас арадеш, сабур, бузерилизир сархибдешуни ва гIямрулизиб разидеш дираб!