Багьудичевси адам гьарра шайчивад пагьмучевсили вирар викIалра, сеналра хатIа бетхIерар. СенахIенну илини сунела багьудлуми гIямрула гьарил бетуцлизир гIягIниси тяхIярли пайдаладиру, сайра цархIилтас гIибратли ветарар.
ГIергъиси замана, гIулухъаби Интернетла ва кьакьала асарлиуб вайси даражаличи биркули саби, чархлис зараллати держ дужули, чула арадешра дагьрира заякадирули сари. Европала улкнанира, имцIатигъунти аги-кьяйдализиб, жагьилти бархьси гьунчибад чеббалкIахъес халаси хIянчи дурабуркIули саби.
Ишгъуна бархибси замана дебали дигеси саби илдала вайси асарлиу хIебикили, белчIудилизибра ункъли бажардибикили, спортлизирра сархибдешуни дирахъути гIулухъаби лебхIели. Илдала лугIилизир пахруличил гьанрушес дигулра МяхIячкъалала 60 ибил школала 9-ибил классла ручIан Марьям Расуловара. Сунела камти гIямруличи хIерхIеили, ил гIяхIцад сархибдешуни диахъес бажардирикили сари. Илала неш, сунела санигIят ункъли бяркъурси медицинала хIянчизар ПатIимат Каримова Дахадаевла районна Зильбачила шилизивадси, сунела гIяпабаркь, нушачивад жявли арякьунси, машгьурси мугIяллим Ацци Каримовла хъалибарглизирадси сари.
Зильбачила шила бехIбихьудла школа белчIи гIергъи, Марьям МяхIячкъалала 60 ибил школализи шуррухъунсири. Цаибти бурхIназирал илини сунела мурхьти багьудлуми чедаахъиб ва барх бучIути-ургаб халаси хIурмат сархиб. ИмцIаливан илис нешла мезла дурсри дигахъу. Дарган мезличи илизир диги адикьурти гIямрулизирад жявли шалгIеррухъунси, пергер мугIяллим, нешла рузи СайхIят Каримовани. Илала къайгъни ва нешла мезла шайчирти багьудлуми лайикьси даражаличир пайдадирули, Марьямли гьар дус шагьарлизиб дурабуркIуси нешла мезла олимпиадаличир гIяхIси хIясилти чедиахъу: цаибти мерани дурцу. Илкьяйдали илини цархIилти предметунасра гIяхIти кьиматуни сари кайсути, чихъти балланачил ОГЭ-бира дедес бажардирикиб.
Буралли, Марьям цазаманализир спортлизирра гьаларяхI рашули сари. Илини дзюла журала абзаначир жигарли бутIакьяндеш дирули рирар. ХIера, чумал баз гьалабра Избербаш шагьарлизир детерхурти абзаначиб илис цаибил мер сархес имканбакIиб. Бара гьалабван ГI.ГIялиевла уличилси спортла КIялгIялизиб бетерхурси Дагъиста чемпионатличибра цаибил мер буцили, Марьям чемпионна уличи лайкьрикиб.
БусягIятла заманара ил гьатIира ахъти даражала абзаначи хIядуррикIули сари. Илдигъунти сархибдешуначир Марьям тIашхIерилзни нуни умутличил буресра вирус.
Макьалала ахирличиб дигахъаси пагьмурчерси, уркIи хIялалси жагьси исбагьис уркIи-уркIиларад гIурра дахъал чедибдешуни далгес. Арати гIямру хIед, Марьям!
Кьади ГIялисултIанов
