ГIяхIси секIайчи адам жявли бурсиирули сай. Гьарилла някъбазир лерти телефонтачи, илдала кумекличил вегIлис дигуси манзиллизив вегIлис дигахъути адамтачил, хIяжатси мерличил бархбас кабизахъес вирниличи адамти гьамадли бурсибиуб. Телефонна бархбас халкьла гIямруличил дебали бархбасун, илис халаси замана харжбирес гIядатласили бетаур. Халатани, дурхIнани телефоннизиб биркьули замана буркIниличила, Интернетли адамти абдалбарниличила дахъал зигаръала дехIдихьиб.
Гьанна биалли тIама-гьама Интернет агниличила, камбиъниличила сари. Урусуни бикIуливан: «Сунезиб гIяхIдеш агарси вайдеш бируси ахIен». Интернетла бархбас камбиубхIели, адамтала акьуси замана имцIабиубли саби. Илизиб гIяхIдешра баргес вирули сай, халкьли замана имцIали пайдачебли харжбарес бетарули саби.
Амма Интернет камбиубли биалра илис харждирути арц имцIадикIули сари. ДигухIели пайдалабарес телефонничиб Интернет агара, арц биалли чула чебаахъибси заманаличир ардихули сари, дила телефонничир биалли асибти 20 гигабайт хIедиули, чеимцIати гигабайтуни асес чебиркули бирар, цацахIели.
Илкьяйда бетарули биалли се барес гIягIнилил Искусственный Интеллектлизи хьарбаира. Илаб Интернетла бархбас пайдалахIебарили виъни кабизахъес багьандан дебали дархибти далилти даргес гIягIнили биъни якьинбиуб. Илди далилтачил харжхIебарибси Интернетла бархбаслис оператортани касибти арц чардарахъес мажахIят вирар или пикрирухъунра. Искусственный Интеллектли бархбас агарли биъниличила бурути суратуни экраннизирад черкадяхъес, Интернет агарли беркIибси замана белгили кабизахъес, илкьяйда дучибти далилтачил бархбас лугути оператортачи дугьаизахъес маслигIятбирули саби ИИ-ли.
Адамти илдигъунти пишнази сен бирхахъути? Бархбас бузахъути оператортани ункъли балули саби, сегъуна замана Интернет лебал, мурт ил агарли адамти кавлулил. Ил агарси заманализиб чула обонентунала арц харжхIедарили калахъес илдани сен хIебирули?
Марлира гIергъиси замана Интернет баракат агарсили бетаурли саби, илини арц харждирули сари, бархбас биалли агарсила даражаличиб саби.
Дила телефон бузахъес базли 648 къуруш харждирути сари, амма гьанна иличир ютуб, инстаграм, телеграм бекIлил дузули ахIен. Интернетра сунес дигухIели леб, хIейгухIели — агара. МАХ-ра, телефонничиб хIебузанбиуб, гIур гIяхIси усталира сагали кабатес хIейуб. Бузерилис гIягIнилихIели цархIил телефонра, сагаси СИМ-картара пайдаладирес рехIрихьира. Гьанна бусягIят илгъуна Интернетла бархбас наб гIягIнили ахIен или пикририкIулра. Кьас саби бегIлара камти гигабайтунасцун арц дедили, телефонничир илдицун харждирес. Илкьяйда барибхIели «Кьиркьириубси кIина харжируси сай», — ибси бурала мархIебиубли, «Кепекли къуруш ахIерабируси саби», — ибси бурала марбиубли дигулра.
Чидил бурала, марбирарал хIушазира бурес пикри леб. ХIердикIехIе се бетарарал.
Газета бучIанти биалли харжхIебарибси Интернетлис арц хIелугехIе бикIахъес жибирулра. Белики, илхIели пикрибулхъан бархбасла операторти, чули гIебхIебуцибси бархбаслис абонентуназирад арц хIейсес.
Муъминат Хаттаева
