МухIела шилизирадси Зумруд ШяхIбанова сунела черетаибдешличил, жавабкардешличил рузули, адамдешличил, яхIличил кIел уршира абилкьули хIеррирули, бахълис гIибратли ретаурли, баркаллаличи ва хIурматличи лайикьрикили сари. Зумруд ШяхIбановачи бекIдарес хъарти чумал хIянчи лерти сари: МухIела шилизибси лицейлизир мугIяллимла, Ахъушала районна хьунул адамтала Советла председательла заместительла, «Память гор» бикIуси СВО-ла бутIакьянчибала ва ветерантала Ассоциацияла сопредседательла, — СВО-ла хасси анцIбукьлизив гъабзадешличил ургъули сунела жан харждарибси Ханпаша ГIябдуллаевла гIямрула рархкьяла пахруличил ура бихуси.
Ишди бурхIназиб хъалибаргла, дигила ва мардешла БархIила байрамлис багъишлабарили Зумруд ШяхIбановани Усишала шилизибси лицейлизиб каникултала манзиллизиб дурхIнала бамсриихъахъуси лагерьлизибти дурхIначил гьунираили, «Классная встреча» бикIуси балбуц дураберкIиб.
Зумруд ШяхIбановани лагерьлизибти дурхIнази хъалибарг сегъуна халаси мягIнала секIал сабил, секьяйдали мяхIкамли, дигиличил, мардешличил, гъабзадешличил хIериэс гIягIнисил гьарил адам буриб. ВатIа ва халкьла челябкьла багьандан, чула гIямру дявила санигIятлис харждарили, гъабзадешличил алхунти бургъантачила гьанбикуни дихIес гIягIнили биъниличила аргъахъиб.
Зумруд ШяхIбановани дурути гъайличи дурхIни иштяхIличил лехIирхъулри. Чулира суалти хьардиули, гIяхIлани жавабти чардалтули, ихтилат гьатIира дигеси тяхIярличиб бетурхулри.
Зумруд ШяхIбанова халараибси сари МухIела шилизибси хIурматчебси хъалибарглизир. Зумруд ШяхIбановала неш ГIяйшат Чупанова паргъатси, хIурматличи ва баркаллаличи лайикьрикибси, дахъал дусмазир МухIела шила бекIла заместительли рузули, хIялалси бузери барибси, жагали урши-рурсира абикьурли, чебяхIси даражала багьудира касахъили, гIямрула гьунчи дураибси хьунул адам сари. Зумруд ШяхI­бановасра сунела неш гIибратли ретаурли рургар.
Иличил барх лебри гIурра районна организациябала жавабла хIянчизарти. Гьунибаънилизир бутIакьяндеш дариб районна «Цаэстала хIяракат» бикIуси дурхIнас хасбарибси организацияла руководитель Расул ГIялиевли, Усишала лицейлизир рузуси мугIяллим Зайнаб ГIябдуллаевани.
Илдигъунти гьунибаъниби гьаман дурадуркIес гIягIнили сари, сенахIенну чеабиуси наслулизир хъалибаргличи, ВатIайчи диги адикьес, бархьси бяркъ бедес чебиркур, челябкьлализир къаршидиркути жу­ра-журала анцIбукьуначи дурхIни хIядурли биахъес багьандан.