МяхIячкъалализиб 2025 ибил дуслизир дурадер­кIибти ва 2026 ибил дуслис дарес хIяжатти хIянчилис хасбарибси Дагъистан Республикала миллатла политикала ва динанала къуллукъунала шайчибси Министерствола коллегияла заседание бетерхур. Балбуцлизир бутIакьяндеш дариб хIукуматла органтала, гIилмула цалабяхъунала, жамигIятла организациябала вакилтани ва муниципалитетунала бургани.
БекIлибиубси докладличил гъайухъун министрла къуллукъуни заманалис дузахъуси, Россияла Игит Темирлан АбутIалимов. Дурабад нушала рес­публикаличи бяхIчиаибси багьахънибалашалси ибкьдешличи ва СВО бетурхниличи хIерхIеили, регионнизир миллатуни-ургабси даршудеш ва цадеш сари. Хаслира пикри бяхIчииуси саби экстремизмалис къаршидеш дирнила ва динна объектунас урехи хIебирахънила масъултачи.
Заседаниела дазурбазиб, сабухъчебси хIянчи дураберкIибти шабагъатлабирнила балбуцра бетерхур. Лавашала районна шайзирад коллегияла бузерилизир бутIакьяндеш дариб жамигIятлис урехи хIебирахъуси ва гIядлу-зегъа далтахъути органтачил барх бузуси отделла начальник Камалудин МуртазагIялиевли. Динна объектунас урехи хIебирахънила баркьудилизиб асилси бузери дураберкIни багьандан, ил ДР-ла миллатла политикала ва динанала къуллукъунала шайчибси Министерствола Баркаллала кагъарличил шабагъатлавариб.
К.МуртазагIялиевлис гьаннала гIергъира Лавашала районна ва Дагъистан Республикала гIяхIдешлис дурабуркIуси бузерилизир гьарбизуни дулгехIе.
Лавашала районна администрацияла пресс-служба