Чисалра дигIяндеш ахIен адамла арадешлис бузерили ва спортли халаси кумекбирни. ВиштIахIейчивадли бегIтани дурхIя вяркъес хIяжатсигу ил бузериличи дигичевсили ва азгъиндеш хIедирусили ветаахъес багьандан. Дубурла шимазиб акIубти дурхIнас ну школализи рашути дусмазиб сегъуналра акьудеш бируси ахIенри. Колхоз-совхозла хIянчилизи ахъибти бегIтас мурталра вегIла хозяйстволизиб кумек гIеббиахъусири нушани диштIахIейчирадли. Дуки-гьунила хIянчи имцIали дурхIнани сарри дирути. Мисаллис, ну акIубси ДугIахъарла шилизиб ва ил-алавти цархIилти шимазиб хIенкьулаби бирути ахIенри. Яргаличил шила шанти дуки башутири. Илкьяйдали ярга баибхIели, классла руководительлизибадли ихтияр касили, дурхIни дуки башутири. ДурхIни агартала яргнира илдачи сарри хъардиркути.
Авлахъла хIянчилизирра жигарла бутIакьяндеш дирутири нушани. Дигалли мура цаладяхъес, дигалли арши диршес башули бири лебилра шила рурсби. БиштIатачи хIеруди бирути имцIаливан шилизибти бухънаби бирутири. Илдала кумекчиби биалли, циила халакабаибти дурхIни. Шиличибадли гьарахъси гIинизларадли шин дихутира дурхIнанири.
Бузерилизибадли акьубухъунхIели, дигалли рурсби дигалли уршби арадешлис дебали пайдалати хIязанази ихъули бири. Майдунтачиб ва шурми-ургабад саберхурли бумхIути дурхIни камхIебири мурталра. ИтхIели шимазиб бахъал дурхIнира бирутири, гьарил хъалибарглизиб шуличибадли вецIличи бикайчи яра гьатIира имцIали уршби-рурсбира лебтиригу. Илкьяйдали ца минутла манзиллисра нушаб бамсриахъес биркуси ахIенри. БекIлил думсулира хIедирехIери кьалли итхIели.
Шилизибадли бучIес яра гIярмиялизиб къуллукъбарес арбукьяллира, спортлизир гIяхIти сархибдешуни дирахъутири шимала уршби-рурсбани. Илкьяйдали кьуватчебти ва спортлашал гIяхIил хIядурбиубти бири итхIели жагьилти.
ИшхIелла агиличи пикри бяхIчиаалли, тамашахIейэс тяхIяр агара. Халатала ибси барес дурхIнас дигули ахIен. БегIтани илдачи се-биалра хъарбаралли, сен нуни бируси ил хIянчи цархIилли хIебирули или разиагардеш далахъули сари илдани. Гьайгьай, шимазиб гьанна лебгIеб камли саби дурхIни. Лебтира хъулрази дигIянбикили, телефонтазиб саби. Хъалибаргла члентас бархли саби-ургаб ихтилатбикIес дигули ахIен. Чуйна хIеризаллира, хала бегIти ца шайчиб, бегIти итил шайчиб ва дурхIни илдачибадли циила гьарахъли, телефонтала арилизиб саби. Илдазибадли цалисалра дигули ахIен телефонра кабихьили, цархIил шайчи шурвяхъес яра чичил-биалра ихтилатикIес.
Шимазибти адамти гIергъити дусмазиб «кункти гIямрулигIиб умцIули», шагьуртазиб багьарбиубли саби. Илар, камли диалра, дурхIнас хIязта биркьахъес хасдарибти мер-мусара лер. Сепайда, хIязтабиркьути дурхIни бахъ камли бирар илаб. Нуша дучIухIели, кьакьурбазиб бахъал адамти бири ва илдала къугъати ихтилатуни демжурли дири. ДурхIнала дукелцIили гьарил мер-муса жагадарили дири. Гьанна бухънаби скамейкабачи цацахIели кабиилира бирар. Илдира телефонтира някъбази касили, цаличибадли ца гьарахъли бирар. Илдани гIибрат чехIебиахъалли, дурхIнани чинабадли багьеса ихтилатунира адамтала гьалмагъдешла бархбасунира сегъунти дирутил.
Ну хIеррирусира тах шагьарла дубларти мер-мусаличир хъуми дузахъес гIяхIти шуртIри лер. Амма имцIатигъунти адамтала юрт-алавти мер-муса гIяргIябержунани дуцили сари. Саби биалли, селитрабанира цархIилти арадешлис зараллати дармунтанира делкъахъунти цIедешра овощунира асес базуртачи башули саби.
ЦацахIели шагьарланти бархIехъуназиб кьакьурбазиб къунзкабикIули саби арадеш къулайбирахъулра или. Азбар-гIяялизиб, хъучиб бузни арадешлис кумекли бетарниличила аргъес дигули ахIен илдас. ХIери баайчи бусули, абзур бархIи арадешлис багалабиэсил хIянчи хIебирули, чили-биалра дарибти берклуми пайдаладирули сари гьанна адамтани. Жагьилтас бекIлил хурег хIядурбарес дигули ахIен. Техникала кумекличил хъулирти хIянчира гьунчидиркахъули сари, илкьяйдали илдачирадли азгъиндешра чедидиркули сари.
БегIтани илгъуна мисал чебиахъухIели, дурхIнасра сегъуналра хIянчи барес дигули ахIен. Илдани белчIудира къиянси баркьудилизи халбирули саби. Репетитортала кумекличил багьудлуми кайснила жураличи аги шурбулхъули саби. Гьарли-марли я бузерилизиб, я белчIудилизиб бархибти дурхIни дебали камли саби. Улкалисра жамигIятлисра илгъуна даражали гIяхIдеш хIебирахъни чисалра дигIяндеш ахIен, сепайда…
Тренертас бегIтани арц дедлугули, спортлизи ахъибти дурхIнас бархли халкьсун чула арадешличи чекабизес дигули ахIен. Чедибдешуни биалли, гьамадли сархес вируси ахIен. Адамли се-биалра сархес ибси кьасчевдешли, гьалавяхI вашес гъирачебдешли ва бузерили сари черяхIти чедибдешунира дирахъути. ГIякьлу бурусиличи яра гIяхIси секIал гIеббурусиличи лехIбизес дигули ахIен гьанна дурхIнас ва жагьилтас. Илдас гьанбиркули саби телефоннизирадли дагьуртани чула челябкьла вавалибирхъяхъу или… Илгъуна агилизир излуманира адамличи чябхъинти имцIадирахъули сари…
ПатIимат Кьурбанова
