Ишдусла февраль базла бегIла бугIярти бурхIназирра урхьула дубличи шадир дурарулхъули калунра. ЗярхIси гьаваличир къунзрикIнили дила арадеш къулайбарес кумекбирулри.

Гьайгьайра, дунъяла тIабигIятла дахъал жагадешуназибад бегIлара чеббикIибси жагадеш саби нушала урхьу. Ил гьатIира жагабирулри урхьула дубларти арцантани, чайкабани, лагьнани, бутIрани, дахъал журала чякнани.

Урхьула дубличир ну разирарира арцанти далхути хьунул адамтани. Барх бакIили, арцанти далхути хIябал хьунул адам бегI гьалаб чебаибхIели, ну дебали разириубра. Дунъяличиб ца гIяхIдеш имцIабирахъути, гIядатла хьунул адамти чебаэс дигеслири.

«Нуша юлдашуни унруби сарра. Бахъ уркIи гIергъибулхъулри нясдешуни калкьути мераначи лайбакIибси кьацIличи. ЛайдакIибти кьац дурчес ва арцанти далхес пикрибарира. Гьанна гIяхIцадхIи диублира илкьяда бирули. Арцанти нушачи бурсдиубли сари, нушала някълизибадра бархли кьацI хъямбирули сари», — бикIулри хьунул адамти, илдачил ихтилатбарибхIели. Илдицун ахIи, гIурра гIяхIцад арцанти далхути хьунул адамти чебаира нуни урхьула дублар къунзрикIухIели.

Дебали разириубра адамтазирад арцанти уруххIекIниличи. Илди хьунул адамти чехIебиахъули,  дахъ-дахъал алавдакIили урцулри. Тамашадеш сабри сецад дахъал лерли диалра, чайкаби цализи итил къячхIедилкнира. Илди мекъличибти адамтиван разилири, садерхурли арцурли, лайбакIибси кьацIла къидикъар гьаваличиб лебай хъямбирули дугулри.

Тамашариубра ну чайкабачир гIяхIцад халати, хъула бутIрачира. Илди урхьулизир кIуртIдикIули дейгIес хIейэсли дахъал лерри. Илдира адамтазирад урухкIули ахIенри. Илди дугелира урхьулизир дуутирил, яра чина-биалра ардашулрил нуни багьес хIериубра.

Шагьар дяхIили кабуцибхIели урхьула дубла дакIили дебали дахъал шагьарла лагьнира лерри илар. Илдира адамтазирад урухкIули ахIенри.

Адамтазирад уруххIекIути арцантира, илди далхути хьунул адамтира, ишбархIила хIякьикьатла дигеси сурат саби. Ил суратли дунъя жагабирулри.

Муъминат Хаттаева