Уллуев ГIябдуллагь МяхIяммадович акIубси сай 1902-ибил дуслизив МухIела шилизив, бахъал дурхIнала хъалибарглизив. ГIябдуллагь Уллуев жявли цIуръавиубсири, илала бегIти жагьли лебай гIямрулизибад арбякьунтири, бунагь-хатIа урдуцаб чула. ВерхIел урши-рурси цIуръабиубтири.
ГIябдуллагь дурхIяхIелил се-дигара барес гIелумхIелзуси, бузериличи дигичевси сайри. Дагъистайзиб Совет хIукумат кабилзути дусмазив, ГIябдуллагь Грозныйзив урчи дихIули узес вехIихьибсири.
1928 ибил дуслизиб МухIела шилизиб «Красный октябрь» бикIуси шила хозяйствола мицIираг дихIуси артель акIахъубсири. Артельла бутIакьянчибани саби бузуси хозяйстволизи урчи, бугъни, маза дикутири, ГIябдуллагьли илдачи хIерудибирусири. 1941 ибил дуслизив ГIябдуллагь Уллуев Ахъушала районна Кировла уличилси колхозла урчи дихIуси фермала заведующий вариб. Илини дяркъурти урчани районна ва республикала кьадрила жура-журала абзаначир гьаларти мерани дурцулри.
ЧебяхIси ВатIа дергъла замана ГIябдуллагь чуйнара Ахъушала районна дявила комиссариатлизи дугьавизурсири дявтази арукахъес или, илаб илизи бурибсири: «хIуни ишаб бируси бузерила кумек халаси саби, чедибдеш сархахъес багьандан бетурхахъуси». Ил багьанданра ГIябдуллагьли халаси къайгъибирули уили сай, дергълизи дархьес гIяхIти, цIакьти урчи руркъули.
1948 ибил дусла сентябрьла 15-личив СССР-ла Верховный Советла Президиумла ХIукму хIясибли, ГIябдуллагь Уллуев Социалист бузерила Игитла уличи лайикьикибсири, илис Ленинна орден ва «Серп и Молот» («Кьякьра миршра») бикIуси медаль дедибтири. ЧебяхIси ВатIа дергъла манзиллизиб Чедибдеш сархес ва халкьла шаласи челябкьла багьанданра барибси ГI.Уллуевла бузери ахъси даражаличил кьиматлабарибсири.
С.ГIябдуллаева
