Ахъушала районна ЗАГС-ла отделла бекI специалист ХIямидова Муслимат МяхIяммадовначил хIянчила чебкад ихтилат дураберкIира.
ДяхI шаласи, малхIямси, бажардичерси, халкьличил ралгунси, 2005-ибил дусличирад рехIрихьили, ЗАГС-ла отделлизир жавабкардешличил, черетаили рузуси Муслимат МяхIяммадовнани Ахъушала районна халкь-ургаб хIурмат сархили сари. Ишди бурхIназир иличил къарширикира ва чумал суал хьардаира.
– Ца бархIила бухIнаб чум адам ЗАГС-лизи дугьабилзули бирара?
– Гьар бархIи нушачи 15-20 адам дугьабилзули бирар, гьатIира имцIали бакIибси заманара бирар. Гьалаб нушала ЗАГС-ла отдел Ахъушала районна администрациялизи кабурхусири, гьанна биалли ДР-ла Юстицияла Министерстволизи кабурхуси саби. Ил багьандан нушала хIянчилизир чумал дарсдеш детаурти сари.
Нушачи дугьабилзутала жура-журала къуллукъуни дирар: дурхIя акIнила кагъар, у бехIсурбарес, фамилия бехIсурбарахъес, дурхIялис дудешдеш кадизахъес, документуназирти хатIаби гьардарес, хъайчикабирути жагьилтас, декIарабиркутас документуни дицIахъес, гIямрулизибад арбякьунтала свидетельствоби дедлугни ва цархIилтира.
— Арбякьунси дуслизиб Ахъушала районнизиб чум дурхIя акIуба, чум жагьил хъайчикабииба?
– Арбякьунси дуслизиб Ахъушала районнизиб 551 дурхIя акIуб, ЗАГС-лизиб белкI барахъили, 49 жагьил хъайчикабииб, 132 декIарабикибти биуб, 185 дурхIялис дудешдеш кадизахъур, виштIаси вихIес сасибси чилра хIейуб, 26 адам у бехIсурбарибтира лебри, 286 адам гIямрулизибад арбякьун, 442 адамли сагали свидетельствоби касиб. ДекIарабиркути судла хIукму хIясиблира бирар.
— ЦархIилти организациябачил сегъунти бархбасуни лера?
– Нушани дахъал организациябачил бархбас бузахъуси саби: МФЦ-личил, ОМВД-личил, Пенсионный Фондличил, ЦСЗН-личил, судличил ва цархIилтачилра.
ГIергъиси замана судличил имцIали бархбас бузахъес хIяжатбиркули бирар, сенахIенну дахъал суалти алкIули сари давла-масличил дархдасунти. Илди суалти арзес багьандан, гьаман судличи дугьадилзес гIягIнили саби.
— Дугьабилзути адамтала къуллукъуни заманаличир бекIдарес, дурала мераначирад дакIибти кагъуртас жавабти чардатес бажардидиркулраяв?
— Нушачи дугьабизурти адамтала къуллукъуни камси заманала духIнар бекIдарес гIягIнити сари. Дурала мераначирад дакIибти кагъуртасра жавабти чардалтулра, сецад жявли диахIеллира.
Гьанна ил хIянчи электронный тяхIярличиб бетурхуси саби, ил багьандан халаси гьамаддеш леб. Ил дурабуркIуси саби «Единый портал государственных услуг» – ЕПГУ, (Суперсервис) бикIуси программа хIясибли.
«Рождение ребенка» бикIуси Суперсервисла кумекличил виштIаси акIубхIели илала бегIтани дурхIялис гIягIнити документуни дарес бирули саби электронный тяхIярличил, ил хIерируси мер белкIахъес, СНИЛС, ИНН ва ОМС багьес багьандан сагали акIубси дурхIяла. Хъули кабиили, яргаличи тIашхIебизурлира, бегIтани дурхIя поликлиникализи велкIахъес, социальный кумекла шайчирти гIярзаби дедес ва гIурра дахъал цархIилтира секIал дарес бирули саби.
ДурхIя акIнила кагъар дигалли касес бирули саби, дигалли электронный тяхIярличиб батес бирули саби.
Гьанна электронный тяхIярлира дугьабилзес бирути саби.
— Чум хIянчизар леба ЗАГС-ла отделлизиб?
— Нушала кIел штат сари лерти, амма хIянчи лер дахъал, ну бекI специалист сарра, МяхIяммад ГулбяхIяндов специалист сай. Нушачи хъарси хIянчи жавабкардешличил, кьанхIебиахъубли, адамтала мурад бетурхахъули дузес къайгъибирехIе гьаннала гIергъира.
С.ГIябдуллаева
